Тэджвіды
Тэджві́ды (араб. 'правіла чытання Карана') – дапаможныя кнігі беларускіх татар, па якіх вучыліся чытаць Каран. У тэджвідах разглядалася чытанне літар арабскага алфавіта, вымаўленне гукаў, знакі паўз (спыненне голасу ў акрэсленых месцах Карана) і г. д.
Большасць беларускіх татар, акрамя некаторых рэлігійных тэрмінаў і формул услаўлення Алаха і яго пасланніка Мухамада, амаль нічога па-арабску не разумела. Чытаючы арыгінальны тэкст Карана, яны мелі перад сабой у кнігах для набажэнства пераклады на польскую мову, напісаныя арабскімі літарамі. Некаторыя суры (раздзелы) Карана яны ведалі на памяць.
Звычайна тэджвіды – гэта частка кітабаў, як асобныя кнігі тэджвіды сустракаюцца рэдка. Адзін такі тэджвід перад Другой сусветнай вайной знаходзіўся ў калекцыі муфціята ў Вільнюсе (страчаны).
Літаратура
[правіць | правіць зыходнік]- Цітавец А. Тэджвіды // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — С. 682–683. — 792 с. — ISBN 985-11-0378-0 (т. 2), ISBN 985-11-0315-2.