Факультэт права і гаспадаркі БДУ

Факультэт права і гаспадаркі БДУ
БДУ
Заснаваны	1925
Закрыты	1930

Факультэт права і гаспадаркі БДУ (Праўгас) — колішні факультэт Беларускага дзяржаўнага ўніверсітэта, які існаваў у 1925—1930 гадах. Створаны на базе факультэта грамадскіх навук БДУ. Рэарганізаваны ў факультэт савецкага будаўніцтва і права БДУ і ў факультэт народнай гаспадаркі БДУ.

Гісторыя

У 1924 годзе было прынята рашэнне аб закрыцці факультэта грамадскіх навук. 25 жніўня 1925 года факультэт грамадскіх навук быў рэарганізаваны ў факультэт права і гаспадаркі (прававое і эканамічнае аддзяленні). Дэканам новага факультэта быў прызначаны праф. Сямён Якаўлевіч Вальфсон.

Вядома пра існаванне кафедр: гісторыі народнай гаспадаркі; палітычнай эканоміі; статыстыкі; прыкладной эканомікі; рахункавых навук; кааперацыі; фінансавых навук; таваразнаўства і тэхналогіі; гісторыі права; дзяржаўнага права СССР і БССР; грамадзянскага права; карнага права; адміністрацыйнага права.

У 1927 годзе адкрываецца аспірантура па эканоміцы. У адпаведнасці з пастановай СНК БССР ад 08.06.1927 БДУ было дадзена права прымаць да абароны доктарскія дысертацыі (вучоная ступень кандыдата навук была ўведзена толькі ў 1934 годзе).

Тэмы навуковых пошукаў у значнай ступені насілі міждысцыплінарны характар: тэорыя дзяржавы, тэорыя класаў і дыктатуры пралетарыяту, адносіны з сялянствам, тэорыя прадукцыйных сіл і адносін, паняцце ўласнасці.

На факультэце існавалі наступныя навукова-дапаможныя ўстановы:

• Кабінет марксізму і ленінізму
• Кабінет права і эканомікі
• Кабінет статыстыкі
• Беларускі кабінет па вывучэнню злачынцы і злачыннасці

У 1930 (паводле некаторых звестак — у 1929) факультэт гаспадаркі і права быў падзелены на факультэт савецкага будаўніцтва і права (савецкага права і будаўніцтва) і факультэт народнай гаспадаркі БДУ.

Дэканы

• Сямён Якаўлевіч Вальфсон — 1925—1930

Літаратура

• Пічэта, В. І. Беларускі Дзяржаўны Унівэрсытэт 1921—1927. Да 10-й гадавіны Кастрычнікавай рэвалюцыі : зборнік артыкулаў. — Менск, 1927. — С. 5-46.
• Мінскі юрыдычны інстытут // Беларуская энцыклапедыя: У 18 т. Т. 10: Малайзія — Мугаджары / Рэдкал.: Г. П. Пашкоў і інш. — Мн. : БелЭн, 2000. — Т. 10. — С. 454. — 10 000 экз. — ISBN 985-11-0035-8. — ISBN 985-11-0169-9 (т. 10).

Спасылкі

• З ПРАТАКОЛА ПАСЯДЖЭННЯ БЮРО ЦК КП(б)Б 24—25 ліпеня 1924 г. (НАРБ. Ф. 4-п. Воп. 3. Спр. 3. Л. 245. Машынапіс. аўтогр.)
• ЗАЯВА ДАЦЭНТА БЕЛДЗЯРЖУНІВЕРСІТЭТА Е. I. РЫЎЛІНА Ў МІНСКУЮ АКРУЖНУЮ КАНТРОЛЬНУЮ КАМІСІЮ АБ БЕЗУМОЎНЬІМ ПАДПАРАДКАВАННІ РАШЭННЯМ XV З’ЕЗДА ВКП(б) I АСУДЖЭННІ СВАЁЙ ФРАКЦЫЙНАЙ РАБОТЫ Студзень 1928 г. (НАРБ. Ф. 4 п. Воп. 5. Спр. 656. Л. 107—108. Машынапіс. коп.)
• ІНСТРУКЦЫЯ ДЛЯ ПРАВЯДЗЕННЯ НАВУКОВЫХ ДЫСПУТАЎ ДЛЯ АТРЫМАННЯ НАВУКОВАЙ СТУПЕНІ Ў БДУ 15 лютага 1928 г. (НАРБ. Ф. 205. Воп. 1. Спр. 272. Л. 76а— 77. Машынапіс. коп.)
• З ПРАТАКОЛА № 25 ПАСЯДЖЭННЯ ПРАЎЛЕННЯ БДУ 18 красавіка 1928 г. (НАРБ. Ф. 205. Воп. 1. Спр. 272. Л. 118—120. Машынапіс. аўтогр.)
• СА СПРАВАЗДАЧЫ АБ ПРАЦЫ АСПІРАНТАЎ БДУ ЗА 1928/29 АКАДЭМІЧНЫ ГОД (НАРБ. Ф. 205. Воп. 1. Спр. 272. Л. 144—150. Машынапіс. аўтогр.)
• СА СТАТУТА БЕЛАРУСКАГА ДЗЯРЖАЎНАГА УНІВЕРСІТЭТА 30 студзеня 1929 г. (НАРБ. Ф 7. Воп. 1. Спр. 635. С. 77—79.)