Фондавы індэкс

Параўнанне трох асноўных фондавых індэксаў ЗША: NASDAQ Composite, DJIA і S&P 500 . Усе тры мелі аднолькавую вышыню ў сакавіку 2007 года. NASDAQ рэзка вырас падчас бурбалкі дот-комаў у канцы 1990-х гадоў з-за вялікай колькасці тэхналагічных кампаній, якія ўваходзілі ў гэты індэкс.

У фінансах фондавы індэкс або індэкс фондавага рынку — гэта лічбавы паказчык для ацэнкі стану выбраных кампаній на фондавым рынку. Ён дапамагае інвестарам ў параўнанні бягучых цэн на акцыі з мінулымі цэнамі.

Інвеставанне ў фондавы індэкс — гэта стратэгія інвеставання, у якой інвестар купляе долю індэкснага фонду, які ў сваю чаргу купляе акцыі кампаній прапарцыянальна пэўнаму індэксу. Такім чынам, інвестар павінен атрымаць прыбытак непасрэдна звязаны з ростам індэкса, а яго інвестыцыі дыверсіфікаваныя адносна кампаній індэкса. Розніца паміж эфектыўнасцю індэкснага фонду і індэксам, калі такая ёсць, называецца памылкай адсочвання.

Тыпы фондавых індэксаў па зоне дзеяння

• Глабальныя індэксы

Глабальныя індэксы маюць мэтаю паказаць стан сусветнага фондавага рынку. Напрыклад, індэкс MSCI World налічвае амаль 1400 кампаній, якія пакрываюць прыблізна 85 % рынкавай капіталізацыі ў 23 развітых краінах. Індэкс S&P Global 100 больш абмежаваны і ўключае толькі 100 кампаній.

• Рэгіянальныя індэксы

Рэгіянальныя індэксы паказваюць дынаміку фондавага рынку асобнага геаграфічнага рэгіёна. Да такіх індэксаў адносяцца, напрыклад, індэкс FTSE Developed Europe і індэкс FTSE Developed Asia Pacific.

• Краінавыя індэксы

Краінавыя індэксы паказваюць дынаміку фондавага рынку асобнай краіны і, такім чынам, адлюстроўваюць настроі інвестараў адносна стану эканомікі краіны. Найчасцей такія індэксы складаюцца з акцый буйных кампаній, што каціруюцца на найбуйнейшых фондавых біржах краіны. Прыклады: DAX у Германіі, NIFTY 50 у Індыі, Nikkei 225 у Японіі, KSE 100 у Пакістане, FTSE 100 у Вялікабрытаніі і індэкс S&P 500 у ЗША.

• Біржавыя індэксы

Гэтыя індэксы заснаваныя на біржы, на якой гандлююцца акцыі, напрыклад, NASDAQ-100, або групах біржаў, такіх як Euronext 100 або OMX Nordic 40.

• Сектаральныя індэксы

Гэтыя індэксы паказваюць стан пэўных сектараў рынку. Напрыклад, сектаральныя падіндэксы S&P 500 Energy, S&P 500 Health Care, S&P 500 Info Tech і г.д.