Царква Святой Тройцы (Старыя Пескі)

Праваслаўны храм
Царква Святой Тройцы
52°30′37″ пн. ш. 25°12′26″ у. д.
Краіна	Беларусь
Вёска	Старыя Пескі
Канфесія	Праваслаўе
Епархія	Брэсцкая і Кобрынская епархія
Дата пабудовы	1827 год
Стан	дзейнічае
Медыяфайлы на Вікісховішчы

Свята-Троіцкая царква — праваслаўны храм у в. Старыя Пескі Бярозаўскага раёна Брэсцкай вобласці. Знаходзіцца ў цэнтры вёскі.

Гісторыя

Пабудавана ў 1827 годзе з дрэва. У 1968 годзе адноўлена.

Архітэктура

Помнік народнага дойлідства. Адназрубны прамавугольны ў плане аб'ём пераходзіць у трохгранную апсіду, вальмавае пакрыццё якой з'яўляецца працягам двухсхільнага даху асноўнага аб'ёму. Над галоўным фасадам у дах урэзана 1-ярусная чацверыковая званіца з васьмігранным шатром, завершаным макаўкай. У цэнтры дах праразае двух'ярусны васьмярык з гранёным цыбулепадобным купалам. У 1968 г. перад уваходам у храм пабудаваны двухслуповы ганак пад двухсхільным пакрыццём, завершаным макаўкай. Пабеленыя вертыкальныя брусы-сцяжкі, простыя ліштвы прамавугольных і стральчатых аконных праёмаў надаюць будынку графічны геаметрызаваны характар, што падкрэслівае і вертыкальная шалёўка фасадаў. У агульны аб'ём царквы ўпісаны невялікі прытвор з бакавымі каморамі і галерэяй хораў над імі.

Інтэр'ер

Прастора апсіды вылучана драўляным двух'ярусным іканастасам, які створаны ў 1878 г. ў рэтраспектыўных формах класіцызму і барока; мае разныя царскія вароты з абразамі-тонда 18 ст., перанесенымі з царквы ў в. Альшэва. Абразы 17 — 18 ст. «Каранаванне Маці Божай», «Мікалай Цудатворац», «Віленскіе мучанікі Антоній, Іаан, Яўстафій», «Маці Божая», «Святы архідыякан Сцефан», «Троіца новазапаветная», «Святы архістратыг Міхаіл», «Ражджаство Хрыстова», «Ісус з дзяржавай», «Уздвіжэнне Крыжа Гасподняга», «Маці Божая Адзігітрыя», трыпціх «Маленне аб чашы», «Прападобны Серафім Сароўскі» (пачатак 20 ст.).

Літаратура

• Праваслаўныя храмы Беларусі: энцыклапедычны даведнік / А. М. Кулагін; [рэдакцыйны савет: Г. П. Пашкоў, Л. В. Календа]. — Мінск: Беларуская Энцыклапедыя, 2007. — 653 с. 2000 экз. ISBN 978-985-11-0389-4

Спасылкі

• На Вікісховішчы ёсць медыяфайлы па тэме Царква Святой Тройцы (Старыя Пескі)
• Царква Святой Тройцы (Старыя Пескі) на сайце Праваслаўная архітэктура Беларусі (бел.)
• Царква Святой Тройцы (Старыя Пескі) на сайце Radzima.org
• Царква Святой Тройцы (Старыя Пескі) на сайце Глобус Беларусі (руск.)
• Царква Святой Тройцы (Старыя Пескі) на сайце «Архіварта»