Цешкава

Вёска Цешкава Краіна Беларусь Вобласць Мінская Раён Пухавіцкі Сельсавет Турынскі Каардынаты 53°33′50″ пн. ш. 28°12′02″ у. д. Першая згадка 1584 Насельніцтва ▲33 чал. (2019) Часавы пояс UTC+3 Тэлефонны код +375 1713 Аўтамабільны код 5 Цешкава на карце Беларусі ±

Цешкава на Вікісховішчы

Це́шкава (трансліт.: Cieškava, руск.: Тешково) — вёска ў Пухавіцкім раёне Мінскай вобласці. Уваходзіць у склад Турынскага сельсавета.

Гісторыя

Цешкава (ст.-бел. Тешково) упамінаецца ў 1584 годзе, уласнасць Кішкаў па Радзівілах, адносілася да маёнтка Пухавічы, у Менскім павеце Менскага ваяводства Вялікага Княства Літоўскага. У канцы XVIII стагоддзя фальварак Цешкаў (Цешкава) адносіўся да маёнтка Турын, уласнасць Валадковічаў.

У выніку другога падзелу Рэчы Паспалітай 1793 года тэрыторыя апынулася ў складзе Расійскай імперыі, у Ігуменскім павеце Мінскай губерні. У XIX стагоддзі згадваюцца аднайменная вёска і фальварак, фальварак месціўся на поўдзень ад вёскі. У 1858 годзе ўласнасць К. Хмялеўскага. Пасля 1861 года ў Пухавіцкай воласці Ігуменскага павета. У 1889 годзе фальваркам Цешкаў валодала дваранка рыма-каталіцкага веравызнання Марыя Генрыхаўна Хмялеўская, было 253 дзесяціны зямлі.

Відавочна, у далейшым фальварак быў падзелены на амаль роўныя часткі паміж братамі Альфрэдам і Багданам Хмялеўскімі. У 1913 годзе фальваркам Цешкава валодаў Альфрэд Хмялеўскі, была 161 дзесяціна зямлі, Багдану Хмялеўскаму дасталася частка ў 201 дзесяціну, на якім ён стварыў фальварак Зацішша.

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай абвешчана часткай Беларускай Народнай Рэспублікі. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў пад акупацыяй Польшчы (Мінская акруга ГУУЗ).

З 31 ліпеня 1920 года ў Беларускай ССР. Фальваркі Цешкава і Зацішша былі нацыяналізаваныя, абодва сталі называцца пасёлкамі Зацішша, назву Цешкава захавала вёска, створаны пасёлак. У 1920 годзе адкрыта школа 1-й ступені, на 1922 год было 35 вучняў.

У Другую сусветную вайну з канца чэрвеня 1941 года да пачатку ліпеня 1944 года пад акупацыяй Германіі.

Насельніцтва

• 1816 год — 15 двароў, 90 жыхароў
• 1858 год — вёска, 98 жыхароў; маёнтак, 19 дваровых людзей
• 1897 год — вёска, 35 двароў, 215 жыхароў; маёнтак, 3 жыхары
• 1917 год — вёска, 52 двары, 253 жыхары, усе беларусы; маёнтак, 1 двор, 13 жыхароў, усе палякі
• 1929 год — 262 жыхары
• 1999 год — 53 жыхароў
• 2010 год — 26 жыхароў
• 2019 год — 33 жыхары

Літаратура

• Цешкава // Гарады і вёскі Беларусі: Энцыклапедыя. Т. 8: Мінская вобласць, кн. 4 / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2013. — С. 193. — 2 000 экз. — ISBN 978-985-11-0735-9.
• Памяць: Пухавіцкі раён: Гісторыка-дакументальныя хронікі гарадоў і раёнаў Беларусі / Укл. А. А. Прановіч; Рэдкал.: А. М. Карлюкевіч і інш.. — Мінск: Беларусь, 2003. — 749 с. — ISBN 985-01-0251-9.
• Список населенных мест Б.С.С.Р. (б. Минской губернии) / Центральное Статистическое Бюро Б.С.С.Р.. — Минск: Белтрестпечать, 1924.
• Spis ziemian mińskich, posiadających 100 i więcej dziesięcin ziemi // Nad Świsłoczą : kalendarz miński informacyjny na rok 1914 / pod redakcją W. Dworzaczka. — Wilno: Znicz, 1914. — 130 S.

Спасылкі

• На Вікісховішчы ёсць медыяфайлы па тэме Цешкава