Цывільнае будаўніцтва

Аб’екты цывільнага будаўніцтва. Шанхай, Кітай.

Цывільнае будаўніцтва (цывільная інжынерыя, англ.: civil engineering) — будаўнічая галіна, якая займаецца ўзвядзеннем будынкаў і збудаванняў цывільнага прызначэння.

Агульныя звесткі

Цывільнае будаўніцтва, займаючыся стварэннем аб’ектаў цывільнага прызначэння, уключае такія аб’екты як масты, шашэйныя дарогі, чыгункі і вакзалы, хуткасныя сістэмы гарадскога транспарту, тунэлі, аэрапорты, прамысловыя прадпрыемствы, жылыя дамы і адміністрацыйныя будынкі, гасцініцы, паркінгі, манументы, плаціны, прычалы, каналы, водныя шляхі, ірыгацыйныя сістэмы, вадаводы і ўстаноўкі для апрацоўкі вады, сістэмы перапрацоўкі смецця, прамысловых і камунальных сцёкавых вод, берагаўмацавальныя збудаванні, лініі электраперадач і да таго падобнае.

Патрэбы цывільнага будаўніцтва патрабуюць правядзення такіх даследаванняў, як вывучэнне уласцівасцяў ужывальных матэрыялаў, асаблівасцяў мясцовасці, у тым ліку характарыстык глеб і розных гідраўлічных параметраў. Да вобласці цывільнага будаўніцтва прымыкаюць такія дысцыпліны, як архітэктура, ірыгацыя, транспарт, глебазнаўства, геадэзія, гідралогія, а таксама тэхналогія будаўніцтва ў розных умовах эксплуатацыі, уключаючы сейсманебяспечныя зоны.

Аб’екты, якія ўзводзяцца ў ходзе цывільнага будаўніцтва, могуць быць капітальнымі і часовымі. Да першых адносяцца ўсе будынкі і збудаванні, прадугледжаныя праектна-каштарыснай дакументацыяй і якія з’яўляюцца неад’емнай часткай будучага комплексу збудаванняў. Часовымі лічацца будынкі і збудаванні, пабудаваныя на час правядзення будаўніча-мантажных работ. Гэта могуць быць часовыя пад’язныя дарогі, бытавыя памяшканні і іншыя аб’екты, прызначаныя для стварэння неабходных умоў будаўнікам на ўвесь перыяд працы. Пасля заканчэння будаўніцтва часовыя аб’екты падлягаюць дэмантажу і прыбіраюцца з тэрыторыі.

Літаратура

• W.F. Chen and J.Y. Richard Liew, ed (2002). The Civil Engineering Handbook. CRC Press. ISBN 978-0-8493-0958-8. 
• Jonathan T. Ricketts, M. Kent Loftin, Frederick S. Merritt, ed (2004). Standard handbook for civil engineers. McGraw Hill. ISBN 978-0-07-136473-7. 
• Civil Engineering: a very short introduction. Oxford University Press. 2012. ISBN 978-0-19-957863-4. https://archive.org/details/civilengineering00unse. 
• Structural Engineering: a very short introduction. Oxford University Press. 2014. ISBN 978-0-19-967193-9. 

Спасылкі

• Житлово-цивільне будівництво // Термінологічний словник-довідник з будівництва та архітектури / Р. А. Шмиг, В. М. Боярчук, І. М. Добрянський, В. М. Барабаш; за заг. ред. Р. А. Шмига. — Львів, 2010. — С. 92. — ISBN 978-966-7407-83-4.