Яўген Сяргеевіч Кулік

Яўген Сяргеевіч Кулік
Яўген Кулік. Аўтапартрэт. 1961
Дата нараджэння	31 кастрычніка 1937(1937-10-31)
Месца нараджэння	Менск, Беларуская ССР, СССР
Дата смерці	12 студзеня 2002(2002-01-12) (64 гады)
Месца смерці	Мінск, Беларусь
Месца пахавання	Кальварыйскія могілкі
Грамадзянства	Беларусь  СССР
Род дзейнасці	мастак, графічны дызайнер, экслібрысіст
Вучоба	Мінскі дзяржаўны мастацкі каледж імя А. К. Глебава Беларуская дзяржаўная акадэмія мастацтваў
Партыя	Партыя БНФ

Яўген Сяргеевіч Кулік (31 кастрычніка 1937(1937-10-31), Менск — 12 студзеня 2002(2002-01-12), Мінск) — беларускі мастак пасляваеннага перыяду, аўтар эталона гербу «Пагоня» як дзяржаўнага герба Рэспублікі Беларусь у 1991—1995 гадах.

Біяграфічныя звесткі

Нарадзіўся 31 кастрычніка 1937 года ў Менску. Скончыў Мінскае мастацкае вучылішча, а пасля — Беларускі тэатральна-мастацкі інстытут. З 1963 года браў удзел у мастацкіх выставах. Майстэрня Куліка, што знаходзілася ў Мінску насупраць будынка КДБ, стала ў 1960-я гады нацыянальным асяродкамі сталіцы і атрымала назву «На паддашку».

Памёр 12 студзеня 2002 года ў Мінску. Пахаваны ў Мінску на Кальварыйскіх могілках.

Творчасць

У станковых творах распрацоўвае тэмы гісторыі і культурнай спадчыны беларускага народа: серыі «Помнікі дойлідства Гродзеншчыны» (1974), «Славутыя дзеячы гісторыі і культуры Беларусі» (з 1993), малюнкаў рэканструкцый «Замкі Беларусі», лісты «Кірмаш на Беларусі ў XVIII ст.» (усе 1977), «Хрыстос прызямліўся ў Гародні» паводле рамана У. Караткевіча (1978), «На куццю» паводле паэмы Я. Купалы (1982), «Памяці Алены Кіш» (1983), «Паўстанне 1863 г. на Беларусі» (1988), трыпціх «Усяслаў Чарадзей, Ефрасіння Полацкая, Лазар Богша» (1996).

У 1970-1980-я гады займаўся кніжнай графікай, аформіў дзясяткі кніжак, і найлепшымі з іх былі: «Слова аб палку Ігаравым», «Ад гоману бароў» Александровіча, «Мушка-зелянушка і Камарык-насаты тварык» Багдановіча, «Сонечны клубочак» Зуёнка. Але сапраўдным шэдэўрам Яўгена Куліка стала кніга «Песня пра зубра» Міколы Гусоўскага. Завершанасцю кампазіцый, сінтэзам выяўленчых сродкаў вылучаюцца ілюстрацыі да кніг А. Вольскага і іншых.

Вельмі вядомы яго графічныя серыі «Помнікі дойлідства Гродзеншчыны», «Замкі Беларусі», «Паўстанне 1863 г. у Беларусі».

Эталон «Пагоні» як дзяржаўнага герба Рэспублікі Беларусь у 1991—1995 гадах аўтарства Яўгена Куліка.

У 1991 годзе быў адным з аўтараў мадэрнізаванага варыянту герба «Пагоня».

Ушанаванне памяці

У лістападзе 2005 года на магіле на Кальварыйскіх могілках пастаўлены помнік.

Літаратура

• Кулік Яўген Сяргеевіч // Беларуская энцыклапедыя: У 18 тамах / Беларуская энцыклапедыя; Рэдкалегія: Г. П. Пашкоў (галоўны рэдактар) [і інш.]. Том 9: Кулібін — малаіта. — Мн.: Беларуская энцыклапедыя, 1999. — С. 6.
• Гаранская Т. Энцыклапедыст / Т. Гаранская // Род. слова. — 1997. — № 10. — с. 162.
• Марачкін А. Яўген Кулік — творца і чалавек / А. Марачкін // Род. слова. — 1997. — № 10. — с. 155.

Спасылкі

• Сяргей Харэўскі. Мастацтва таталітарызму. Архівавана 13 верасня 2008.
• ПАЎСТАНЕЦ(недаступная спасылка)