Перайсці да зместу

Northrop B-2 Spirit

З Вікіпедыі, свабоднай энцыклапедыі
B-2 Spirit
Northrop B-2 Spirit
Тып Бамбардзіроўшчык
Распрацоўшчык Northrop Grumman
Вытворца Northrop Grumman Corporation і Northrop[d]
Першы палёт 17 ліпеня 1989
Пачатак эксплуатацыі 1997 год
Статус эксплуатуецца
Эксплуатанты Сцяг ЗША ВПС ЗША
Адзінак выраблена 21
Лагатып Вікісховішча Медыяфайлы на Вікісховішчы

Northrop B-2 Spirit («Дух») — амерыканскі цяжкі малапрыкметны стратэгічны бамбардзіроўшчык, распрацаваны кампаніяй «Нортрап Груман» (Northrop Grumman).

B-2 Spirit — першы серыйны сучасны цяжкі самалёт са схемай «лятаючае крыло». Прызначаны для прарыву шчыльнай супрацьпаветранай абароны (СПА) і дастаўкі звычайнай ці ядзернай зброі. Першы палёт адбыўся ў 1989 годзе. Вытворчасць спынена ў 2000 годзе. У самалёце шырока выкарыстаны тэхналогіі малапрыкметнасці: самалёт пакрыты радыёпаглынальнымі матэрыяламі, створаны па аэрадынамічнай схеме «лятаючае крыло», рэактыўныя струмені рухавікоў экрануюцца[1]; дакладнае значэнне ЭПР для B-2 не паведамляецца, па розных ацэнках, гэта велічыня ад 0,0014 да 0,1 м². На 2010-год B-2 Spirit з’яўляецца самым дарагім самалётам за ўсю гісторыю авіяцыі.

Ідэя

[правіць | правіць зыходнік]

У сярэдзіне 1970-х у ваенных авіяканструктараў з’явіўся новы метад пазбегнуць ракет, перахопнікаў і залішняй увагі з боку варожых радараў, вядомы сёння як «стэлс». Канцэпцыя заключалася ў тым, каб пабудаваць самалёт з планерам, які адхіляў (або паглынаў) радыёлакацыйныя сігналы так, каб мала што адбівалася назад на радар. Лятальны апарат, які мае характарыстыкі радыёлакацыйнай скрытнасці, зможа ляцець амаль незаўважаным і можа быць атакаваны толькі зброяй і сістэмамі, якія не залежаць ад радара. Нягледзячы на тое, што існавалі іншыя меры выяўлення, такія як чалавечае назіранне, інфрачырвоныя сканеры, акустычныя лакатары, іх адносна малы дыяпазон выяўлення або слаба развітая тэхналогія дазвалялі большасці самалётаў лятаць незаўважанымі, або, па меншай меры, іх немагчыма было адсачыць (асабліва ўначы).

Прататып Have Blue ад Lockheed. На яго аснове быў распрацаваны штурмавік F-117

У 1974 годзе Агенцтва Міністэрства абароны ЗША па перспектыўных даследаваннях (DARPA[en]) запытала ў амерыканскіх авіяцыйных кампаній інфармацыю аб самым вялікім радыёлакацыйным следзе самалёта, які застанецца фактычна нябачным для радараў. Першапачаткова для далейшай распрацоўкі былі выбраны Northrop і McDonnell Douglas. Lockheed меў вопыт у гэтай галіне дзякуючы распрацоўцы Lockheed A-12 і SR-71, якія мелі шэраг асаблівасцей, у прыватнасці, нахіленыя вертыкальныя стабілізатары і выкарыстанне кампазітных матэрыялаў у ключавых месцах. Ключавым удасканаленнем стала ўжыванне камп’ютарных мадэляў, якія выкарыстоўваліся для прагназавання радыёлакацыйных адлюстраванняў ад плоскіх паверхняў, а сабраныя даныя «кіравалі» канструкцыяй «гранёнага» самалёта.

Распрацоўка першых падобных канструкцый пачалася ў 1975 годзе з праекта Experimental Survivability Testbed (XST). Northrop і Lockheed заключылі кантракты ў першым раўндзе выпрабаванняў. Кампанія Lockheed атрымала адзіную ўзнагароду за другі раўнд выпрабаванняў у красавіку 1976 года, які прывёў да праграмы Have Blue і, у рэшце рэшт, стэлс-штурмавіка F-117. У Northrop таксама быў засакрэчаны тэхналагічны дэманстрацыйны самалёт Tacit Blue, які распрацоўваўся ў 1979 годзе ў Зоне 51; яго напрацоўкі пазней былі выкарыстаны ў тым ліку і ў B-2.

Праект ATB

[правіць | правіць зыходнік]

Стварэнне цяжкага бамбардзіроўшчыка пачалося ў 1979 годзе па праграме «Advanced Technology Bomber» (ATB). Ішла Халодная вайна, а ў ходзе перадвыбарнай кампаніі 1979—1980 гадоў кандыдат на пасаду прэзідэнта Рональд Рэйган абяцаў аднаўленне амерыканскіх Узброеных Сіл.

22 жніўня 1980 года Міністэрства абароны ЗША адкрыта абвясціла пра працу па стварэнні перспектыўных малапрыкметных самалётаў, у тым ліку пра праект «ATB».

Пасля ацэнкі праектаў конкурс ATB быў скарочаны да дзвюх каманд — «Northrop/Boeing» і «Lockheed/Rockwell», кожная каманда атрымала кантракт на далейшыя даследаванні. Праект «ATB» фінансаваўся пад кодавай назвай «Aurora».

Абедзве каманды выкарыстоўвалі канструкцыі лятаючага крыла. Праект Northrop меў кодавую назву «Senior Ice», а праект Lockheed — кодавую назву «Senior Peg». Northrop ужо меў вопыт распрацоўкі самалётаў YB-35 і YB-49 з лятаючым крылом. Канструкцыя Northrop была большай і мела выгнутыя паверхні, а канструкцыя Lockheed была гранёнай і ўключала невялікі хвост.

20 кастрычніка 1980 года каманда «Northrop/Boeing» была вызначана пераможцам у конкурсе праектаў.

Праект Northrop атрымаў індэкс B-2 і назву Spirit («Дух»). Праект бамбардзіроўшчыка быў зменены ў сярэдзіне 1980-х гадоў, калі профіль місіі быў зменены з вышыннага на нізкавышынны з абгінаннем рэльефу мясцовасці. Карэкціроўка праекта затрымала пабудову першага B-2 на два гады і запатрабавала дадаткова каля 1 мільёна[удакладніць] долараў на перагляд праекта.

Інжынеры і навукоўцы Масачусецкага тэхналагічнага інстытута дапамаглі ацаніць эфектыўнасць самалёта ў рамках пяцігадовага сакрэтнага кантракту ў 1980-я гады. Тэхналогіі праекта «ATB» таксама былі ўключаны ў праграму ўдасканаленага тактычнага знішчальніка, якая прывяла да з’яўлення Lockheed YF-22 і Northrop YF-23, а пазней і Lockheed Martin F-22.

Да 1986 года на распрацоўку бамбардзіроўшчыка было выдаткавана сумарна 23 млрд даляраў ЗША.

Упершыню B-2 быў паказаны грамадскасці 22 лістапада 1988 года на авіяцыйным заводзе № 42 ВПС ВС ЗША у Палмдэйле (штат Каліфорнія), дзе ён і быў сабраны.

Закупка

[правіць | правіць зыходнік]
Закупкі самалётаў
Год Колькасць самалётаў Бюджэт (млрд дал.)
Самалёт НДВКП Запчасткі Разам
1986 2 $2,3484 млрд $1,7157 млрд 0 $4,1440 млрд
1987 1 $2,7982 млрд $1,5460 млрд 0 $4,3693 млрд
1988 4 $2,6866 млрд $1,2614 млрд 0 $4,0282 млрд

Вытворчасць

[правіць | правіць зыходнік]

Усяго быў пабудаваны 21 самалёт B-2 Spirit. Амаль усе яны названы ў гонар амерыканскіх штатаў[2].

Мадэрнізацыя

[правіць | правіць зыходнік]
B-2 падчас дазапраўкі ў паветры над Ціхім акіянам
Рухавік General Electric F118-GE-100
B-2 у суправаджэнні знішчальнікаў F-22 Raptor, 2010 год
  • У 2008 Кангрэсам ЗША была прафінансавана праграма мадэрнізацыі сістэм кіравання ўзбраеннем для паражэння рухаючыхся наземных цэляў[3].
  • 29 снежня 2008 года быў падпісаны кантракт на мадэрнізацыю радыёлакацыйных сістэм B-2. У ходзе мадэрнізацыі радыёлакацыйныя сістэмы былі пераведзены на іншы частотны дыяпазон. Кантракт абышоўся ЗША прыблізна ў 468 млн даляраў[4][5]. 22 чэрвеня 2009 стала вядома, што ўсе B-2 прайшлі мадэрнізацыю да «другой рэвізіі», якая прадугледжвала паляпшэнне магчымасцяў БРЛС.
  • 28 красавіка 2009 было абвешчана, што мадэрнізаваны B-2 можа несці да 13 500 кілаграмаў карыснай нагрузкі ў кожным адсеку[6].
  • У пачатку 2010 года кампанія «Northrop Grumman» абвясціла аб завяршэнні разлікаў, якія дазволяць ліквідаваць непаладку B-2 Spirit, якая рэгулярна ўзнікала на працягу апошніх 20 гадоў. Непаладка заключаецца ў пашкоджанні металічнай панэлі, якая знаходзіцца паміж рухавікамі і затуляе кампазітны каркас ад распаленага рэактыўнага струменя. Праблема была выклікана стомленасцю металу, якая выяўлялася з-за ўздзеяння высокіх тэмператур, а таксама вібрацый, якія ўзнікаюць падчас працы сілавых установак. Справіцца з непаладкай «Northrop Grumman» плануе за кошт прымянення новых матэрыялаў, а таксама ўнясення невялікіх змяненняў у канструкцыю хваставой часткі B-2. Мадэрнізацыя дзеючых бамбардзіроўшчыкаў у складзе ВПС ЗША будзе недарагой і не запатрабуе правядзення значных работ па змене канструкцыі[7]
  • 4 красавіка 2012 завяршыліся выпрабаванні B-2 з мадэрнізаваным праграмным забеспячэннем, навігацыйнымі і камунікацыйнымі сістэмамі, распрацаванымі па праграме «the Extremely High Frequency (EHF) Increment 1». У ходзе выпрабаванняў B-2 выканалі шэраг палётаў на Паўночны полюс і назад. Мэтай пералётаў была праверка мадэрнізаванага бамбардзіроўшчыка на магчымасць здзяйсняць палёты на вялікай вышыні ў суровых кліматычных умовах. У ходзе місіі на Паўночны полюс бамбардзіроўшчык скінуў чатыры навучальныя свабоднападаючыя бомбы BDU-38. Скід боепрыпасаў і выпрабаванні ў цэлым былі прызнаныя паспяховымі[8].
  • 24 верасня 2012 «Northrop Grumman» абвясціла аб завяршэнні мадэрнізацыі бамбардзіроўшчыкаў B-2, у рамках якой на самалёты былі ўсталяваны новыя БРЛС AN / APQ-181 з АФАР. Кошт мадэрнізацыі, замоўленай ВПС ЗША ў 2008, склаў каля 468 млн $. На самалёты таксама было ўсталявана новае бартавое абсталяванне і сістэмы сувязі. Дзякуючы мадэрнізацыі бамбардзіроўшчыкі атрымалі доступ да адзінай баявой інфармацыйна-кіруючай сістэмы Пентагона[9].

Далейшая эксплуатацыя

[правіць | правіць зыходнік]

У далейшым чакаецца паступовы вывад B-2 з эксплуатацыі і замена яго на B-21.[10] Называліся срокі 2030—2040 год.

Кошт

[правіць | правіць зыходнік]

B-2 з’яўляецца самым дарагім самалётам у свеце (і верагодна, самым дарагім самалётам у гісторыі авіяцыі). На 1998 год кошт аднаго B-2 без уліку НДВКП складаў 1,157 млрд даляраў[11]. Кошт усёй праграмы B-2 на 1997 год ацэньваўся амаль у 45 млрд даляраў; такім чынам, з улікам НДВКП кошт адной машыны на той момант дасягаў 2,1 млрд даляраў[12].

Па сцвярджэнні ВПС ЗША і вытворцаў, высокі кошт самалёта галоўным чынам абумоўлены скарачэннем яго закупак. У сувязі з распадам СССР, з першапачаткова запланаваных 132 бамбардзіроўшчыкаў за ўвесь час вытворчасці было закуплена ўсяго 20 адзінак.[13]

Баявое прымяненне

[правіць | правіць зыходнік]

Аперацыя «Саюзная сіла» (1999)

[правіць | правіць зыходнік]
B-2 пры дазапраўцы ад самалёта-дазапраўшчыка KC-10 Extender пасля місіі ў Югаславіі.

Першы выпадак баявога ўжывання B-2 меў месца падчас аперацыі НАТА ў Югаславіі ў 1999 годзе.

Гэта быў доўгачаканы баявы дэбют самалёта. 24 сакавіка 1999 года B-2 стаў першым пілатуемым самалётам, які пранікнуў у зону «працы» СПА Югаславіі.

Самалёты выляталі з базы Уайтмен (штат Місуры, ЗША), здзяйснялі беспасадкавы пералёт да Косава і вярталіся назад. Разам з 2 дазапраўкамі ў паветры працягласць місій складала 28-32 гадзіны. Вылятаючы на заданне, пілоты часта не ведалі, якая ў іх цэль, бо цэль і яе каардынаты маглі быць выяўлены за 1-2 гадзіны да прыбыцця B-2 у зону цэлі.

У большасці місій B-2 суправаджалі самалёты падаўлення СПА, але ў некалькіх місіях B-2 прыходзілася ляцець над варожай тэрыторыяй без усякай баявой падтрымкі (аднак B-2 дзякуючы сваёй скрытнасці кожны раз праляталі незаўважанымі).

7 траўня ў выніку памылкі пры бамбардзіроўцы самалётамі B-2 было знішчана пасольства Кітая, загінулі некалькі кітайскіх журналістаў і кітайскі мірны жыхар (бомбы былі нацэлены з памылкай у 400 метраў).

За час аперацыі самалётамі B-2 было зроблена 49 вылетаў, 45 з якіх скончыліся скіданнем бомб. Усяго было скінута больш за 600 высокадакладных бомбаў JDAM (з навядзеннем па спадарожнікаваму GPS), якія таксама былі ўжытыя ўпершыню.

Вайна ў Афганістане (2001—2021)

[правіць | правіць зыходнік]
Скід бомбаў Mk 82 падчас вучэнняў у Ціхім акіяне недалёка ад Пойнт-Мугу (Каліфорнія)

Шэсць самалётаў B-2 выкарыстоўваліся ў асноўных баявых аперацыях падчас вайны ў Афганістане ў канцы 2001 года. Самалёты размяшчаліся на авіябазе Уайтмен (штат Місуры, ЗША), здзяйснялі атакі на цэлі ў Афганістане, затым прызямляліся на авіябазе Андэрсан на ціхаакіянскім востраве Гуам для дазапраўкі і пераўзбраення. Затым яны выконвалі яшчэ некалькі бамбардзіровак у Афганістане і, нарэшце, вярталіся на авіябазу Уайтмен.

Пад час вайны была здзейснена самая працяглая баявая місія ў гісторыі авіяцыі (на той момант), яна доўжылася агулам 44 гадзіны (база Уайтмен — Афганістан — база Уайтмен)[11].

Іншыя прымяненні

[правіць | правіць зыходнік]
  • Падчас ваеннай аперацыі «Іракская свабода» ў 2003 годзе B-2 здзяйснялі баявыя вылеты з атола Дыега Гарсія і іншай «перадавой базы», назва якой не выдавалася. З дзвюх гэтых пазіцый было здзейснена 22 баявыя вылеты. З авіябазы Уайтмен было здзейснена 27 баявых вылетаў. У ходзе 49 вылетаў было скінута больш за 300 тон боепрыпасаў. Працягласць баявых вылетаў склала больш за 30 гадзін. Падчас аднаго з вылетаў B-2 заставаўся ў паветры без пасадкі на працягу 50 гадзін[11].
  • 19 сакавіка 2011, падчас ваеннай аперацыі «Адысея. Рассвет» з базы ВПС Уайтмен у штаце Місуры былі паднятыя тры B-2 ВПС ЗША. Сумесна з двума бамбардзіроўшчыкамі B-1 з Паўднёвай Дакоты яны былі накіраваныя ў Лівію. За час усёй аперацыі B-2 знішчылі 45, а B-1B 105 цэляў, сярод якіх былі склады ўзбраенняў, аб’екты СПА, камандна-кантрольныя пункты, аб’екты абслугоўвання авіяцыйнай і іншай ваеннай тэхнікі.
  • 18 студзеня 2017 года два B-2 атакавалі трэніровачны лагер ІГІЛ у 30 км на паўднёвы захад ад Сірта (Лівія), забіўшы каля 85 баевікоў. B-2 разам скінулі 108 штук 230-кілаграмовых высокадакладных кіраваных бомбаў JDAM. Кожны B-2 здзейсніў 33-гадзінны палёт туды і назад з авіябазы Уайтмен (штат Місуры, ЗША) з чатырма ці пяццю (звесткі адрозніваюцца) дазапраўкамі падчас палёту.
  • 16 кастрычніка 2024 года, падчас «крызісу» ў Чырвоным моры, B-2 здзейснілі начную атаку цэляў у Емене. Былі разбомблены пяць бункерных складоў зброі групоўкі Ансар Алах у раёне Саны і Саада.
  • 22 чэрвеня 2025 года B-2 атакавалі ядзерныя аб’екты Ірана ў Форда і Натанзе. Сем B-2 скінулі чатырнаццаць супрацьбункерных бомбаў GBU-57 (12 бомбаў на аб’екты ў Фордзе і 2 на аб’екты ў Натанзе). Гэтая атака адзначыла ўступленне ЗША ў Ірана-ізраільскую вайну лета 2025 года[14]. Пад час бамбардзіроўкі B-2 заставаліся незаўважанымі (да таго ж СПА Ірана была атакавана).
  • 28 лютага 2026 года, пад час ваеннай аперацыі ЗША і Ізраіля супраць Ірана, 4 бамбардзіроўшчыка B-2, узброеныя 900-кілаграмовымі бомбамі, нанеслі ўдары па ўмацаваных аб'ектах балістычных ракет Ірана. Пад час пералёту з базы Уайтмэн B-2 ажыццяўлялі дазапраўку ў паветры з дапамогай самалётаў-палівазапраўшчыкаў KC-46.[15]

Аварыі

[правіць | правіць зыходнік]
Наступствы аварыі на Гуаме

Па афіцыйных даных ЗША, да 2010 года у небаявым здарэнні быў страчаны адзін бамбардзіроўшчык B-2. 23 лютага 2008 года самалёт B-2 (бартавы нумар 89-0127, імя Spirit of Kansas) разбіўся на ціхаакіянскім востраве Гуам на амерыканскай ваеннай базе Андэрсан. Гэта быў першы выпадак крушэння самалёта гэтага тыпу. Абодвум лётчыкам удалося катапультавацца[16] Пасля аварыі палёты ўсіх самалётаў гэтага тыпу былі прыпыненыя. У канцы красавіка 2008 года палеты былі адноўленыя.[17].

Камісія па расследаванні прыйшла да высновы, што прычынай аварыі стала халатнасць наземнага персаналу, які не ўключыў абаграванне прыёмніка паветранага ціску для выдалення назапашанага ў ім кандэнсату. З-за гэтага сістэма кіравання самалёта атрымлівала завышанае значэнне хуткасці і заўчасна дала каманду на адрыў ад зямлі. Дзеянні экіпажа прызнаныя правільнымі, іншых адхіленняў ад штатнага рэжыму ў працы бартавых сістэм не выяўлена, а мадэляванне сітуацыі на трэнажоры паказала, што выратаваць самалёт было немагчыма.

У лютым 2010 года яшчэ адзін B-2 (бартавы нумар 88-0332, імя Spirit of Washington) сур’ёзна пацярпеў у выніку ўзгарання ў маторным адсеку пры запуску рухавікоў на той жа авіябазе Андэрсан. Пашкоджаны самалёт знаходзіўся ў рамонце амаль 4 гады і зноў падняўся ў неба толькі 16 снежня 2013 года[18]. Агульны кошт аднаўленчых работ перавысіў 105 млн $[19].

У ноч з 13 на 14 верасня 2021 года B-2 здзейсніў аварыйную пасадку на авіябазе Уайтмен. Самалёт прызямліўся, выкаціўся за межы ўзлётна-пасадачнай паласы ў траву і спыніўся на левым борце. Пазней было вызначана, што прычынай былі няспраўныя спружыны шасі і мікрашчыліны ў гідраўлічных злучэннях самалёта. Спружыны стопарных звёнаў у шасі, верагодна, не мяняліся па меншай меры дзесяць гадоў, і іх нацяжэнне было прыкладна на 11 % менш, чым паказана. Гэта было аб’яднана з адлучэннем гідраўлічнай трубкі, якая падтрымлівае шасі. Абодва фактары прывялі да складвання шасі пры прызямленні. У выніку аварыі кошт рамонту склаў як мінімум 10,1 мільёна даляраў[20][21].

10 снежня 2022 года B-2 (509-е бамбардзіровачнае авіякрыло ВПС ЗША) здзейсніў аварыйную пасадку на авіябазе Уайтмен. Інцыдэнт адбыўся падчас вучэнняў. Знаходзячыся ў паветры, пілот самалёта паведаміў дыспетчару аб нейкай няспраўнасці і пайшоў на аварыйную пасадку. Пасля прызямлення самалёт загарэўся. Ахвяр і пацярпелых няма[22].

Лётна-тэхнічныя характарыстыкі

[правіць | правіць зыходнік]
Габарытны чарцёж бамбардзіроўшчыка B-2

Тэхнічныя характарыстыкі

[правіць | правіць зыходнік]
  • Экіпаж: 2 чалавекі
  • Даўжыня: 20,90 м
  • Размах крылаў: 52,12 м
  • Вышыня: 5,10 м
  • Плошча крыла: 460 м²
  • Маса:
    • пустога: 71 700 кг
    • нармальная ўзлётная маса: 152 600 кг
    • максімальная ўзлётная маса: 171 000 кг
    • маса паліва: 73 000 кг
    • маса карыснай нагрузкі: да 22 730 кг (да 27 000 кг пасля мадэрнізацыі[6])
  • Нагрузка на крыло:
    • пры максімальнай узлётнай масе: 372 кг/м²
    • пры нармальнай узлётнай масе: 332 кг/м²
  • Рухавік:
  • Цягаўзброенасць:
    • пры нармальнай узлётнай масе: 0,20 кгс/кг
    • пры максімальнай узлётнай масе: 0,18 кгс/кг

Лётныя характарыстыкі

[правіць | правіць зыходнік]
  • Максімальная хуткасць: 1010 км / г (М=0,95)
  • Крэйсерская хуткасць: 900 км / г (М=0,85)
  • Далёкасць палёту:
    • максімальная: 11 100 км
    • баявы радыус: 5300 км
  • Практычная столь: 15240 м
  • ЭПР: па некаторых ацэнках, ад ~0,0014 да ~0,1 м²

Узбраенне

[правіць | правіць зыходнік]
  • Баявая нагрузка: да 22 730 кг (да 27 000 кг пасля мадэрнізацыі[6])
  • Ядзерная зброя: 16 х В61-11 або 16 х B83
  • Звычайныя бомбы: 80 х Mk.82 або 16 х Mk.84 або 36 касетных бомбаў х CBU-87 / CBU — 89 GATOR
  • Высокадакладная зброя: 8 х GBU-27 або AGM-154 JSOW або 12 х JDAM
  • Крылатыя ракеты: 16 х AGM-158 JASSM[23]

Крыніцы

[правіць | правіць зыходнік]
  1. ↑ PASSIVE MULTISTATIC RADARS IN ANTI-STEALTH AIR DEFENCE. By Lieutenant Colonel Paul E. Hudson, BSc, CD1 // Canadian Forces College (англ.)(недаступная спасылка)
  2. ↑ Pace 1999, Appendix.
  3. ↑ Northrop Grumman Adding Mobile Targets to B-2 Bomber Capabilities. Northrop Grumman (7 лютага 2008). Архівавана з першакрыніцы 18 жніўня 2012. Праверана 13 верасня 2009.
  4. ↑ B-2 radar modernization program contract awarded. US Air Force (30 снежня 2008). Архівавана з першакрыніцы 22 ліпеня 2012. Праверана 13 верасня 2009.
  5. ↑ USAF Awards B-2 Radar Upgrade Production(недаступная спасылка). Aviation Week (30 снежня 2008). Праверана 13 верасня 2009.
  6. ↑ а б в Mayer, Daryl. Northrop Grumman and USAF Verify Proper Fit of 30,000lb Penetrator Weapon on B-2 Bomber. defpro.com (22 ліпеня 2009). Архівавана з першакрыніцы 21 жніўня 2009. Праверана 13 верасня 2009.
  7. ↑ Бомбардировщик B-2 избавят от 20-летней неполадки (руск.). lenta.ru (3 сакавіка 2010).
  8. ↑ Бомбардировщик B-2 завершил испытания над Северным полюсом (руск.). lenta.ru (5 красавіка 2012).
  9. ↑ Бомбардировщики B-2 получили новые радары (руск.). lenta.ru (24 верасня 2012).
  10. ↑ USAF to Retire B-1, B-2 in Early 2030s as B-21 Comes On-Line (англ.). Air & Space Forces Magazine (9 лютага 2018). Праверана 5 студзеня 2026.
  11. ↑ а б в B-2 SPIRIT. af.mil. Архівавана з першакрыніцы 16 ліпеня 2012.
  12. ↑ B-2 Bomber: Cost and Operational Issues (Letter Report, 08/14/97, GAO/NSIAD-97-181)(недаступная спасылка). Архівавана з першакрыніцы 21 ліпеня 2014. Праверана 9 студзеня 2023.
  13. ↑ GlobalSecurity.org - B-2 Production (англ.). Архівавана з першакрыніцы 14 лістапада 2012.
  14. ↑ Operation „Mitternachtshammer“: 12 Bunkerbrecherbomben fielen auf die Atomfestung Fordo – so lief der nächtliche US-Angriff ab (ням.). Der Tagesspiegel Online. Праверана 27 чэрвеня 2025.
  15. ↑ CША задействовали стратегические бомбардировщики B-2 против Ирана(нявызн.).
  16. ↑ ВЗГЛЯД / Разбился уникальный самолет(недаступная спасылка). Архівавана з першакрыніцы 6 лістапада 2014. Праверана 23 лютага 2008.
  17. ↑ Лента новостей — PDA.AVIA.RU — Авиационные новости. Архівавана з першакрыніцы 31 мая 2009. Праверана 24 красавіка 2008.
  18. ↑ When You’ve Only Got 20 B-2 Bombers. Архівавана з першакрыніцы 4 студзеня 2014.
  19. ↑ The $105M resurrection of a B-2 stealth bomber(недаступная спасылка). Архівавана з першакрыніцы 23 сакавіка 2014. Праверана 9 студзеня 2023.
  20. ↑ Faulty landing gear springs led to B-2 bomber crash last year, report finds.
  21. ↑ USAF AAIB Report. Архівавана з першакрыніцы 12 ліпеня 2022. Праверана 11 сакавіка 2022.
  22. ↑ Самый дорогой бомбардировщик в мире загорелся после аварийной посадки (руск.). lenta.ru (12 снежня 2022).
  23. ↑ (недаступная спасылка — гісторыя)

Спасылкі

[правіць | правіць зыходнік]
Узята з "https://be.wikipedia.org/w/index.php?title=Northrop_B-2_Spirit&oldid=5106950"