Жаробычы

Вёска Жаробычы Краіна Беларусь Вобласць Віцебская Раён Шумілінскі Сельсавет Сіроцінскі Каардынаты 55°19′ пн. ш. 29°45′ у. д. Першая згадка 1563 Часавы пояс UTC+3 Тэлефонны код +375 2130 Аўтамабільны код 2 Жаробычы на карце Беларусі ±

Жаро́бычы — былая вёска ў Беларусі, цяпер частка вёскі Слабада, Сіроцінскі сельсавет, Шумілінскі раён, Віцебская вобласць.

Назва

У 1939 годзе вёска аб'яднана з вёскай Слабада, у сувязі з чым, сустракалася назва і Слабада-Жаробычы.

Гісторыя

Вядомыя паводле рукапісных гістарычных крыніцаў з 1563 года. Паводле Слоўніка геаграфічнага Каралеўства Польскага і іншых краёў славянскіх (1895), Жаробычы ўваходзілі ў склад Віцебскага павета. Вёска знаходзілася за 48 вёрстаў ад Віцебску. Тут дзейнічала царква Святога Ільі. Таксама існаваў маёнтак Жаробычы, уладанне Косаваў, які налічваў 652 дзесяціны зямлі.

Жаробычы ўваходзілі ў склад аднайменнай воласці, адміністрацыя (валасная ўправа) якой размяшчалася ў вёсцы Грэбніца Сяранская. Жаробыцкая воласць знаходзілася ў заходняй частцы Віцебскага павета. На поўначы межавала з Лосвідскай, на захадзе — з Храповіцкай, на паўднёвым усходзе — з Мышкаўскай, на поўдні — з Старасельскай воласцямі, на захадзе — з Ловажскай воласцю Полацкага павета. У склад воласці ўваходзіла 135 населеных пунктаў. Тут мелася 950 сялянскіх дамоў (апроч таго, 175 дамоў належалі іншым станам), у якіх пражывала 5638 сялян. На 1906 год існавалі маёнтак і сяло Жаробычы.

Жаробычы ўваходзілі ў склад і з'яўляліся цэнтрам Жаробыцкага сельсавета.

Славутасці

• Царква Святога прарока Ільі

Вядомыя ўраджэнцы

• Сільвестр Косаў (канец XVI ст. — 1657) — мітрапаліт Кіеўскі, Галіцкі і ўсяе Русі.