Ян Мікалаевіч Гайка

Ян Мікалаевіч Гайка
Герб «Агеньчык»
1-ы Кашталян берасцейскі 1566 — 1579
Папярэднік	пасада створана
Пераемнік	Багдан Сапега
Нараджэнне	1510(1510)
Смерць	1579(1579)
Род	Гайкі
Бацька	Мікалай Фёдаравіч Гайка
Жонка	Ружа з Жычылаў[d]
Дзеці	Адам Гайка[d]
Веравызнанне	кальвінізм і магчыма Каталіцкая Царква

Ян ГАЙКА (каля 1510 — 1579) — дзяржаўны дзеяч Вялікага княства Літоўскага, дыпламат.

Сын берасцейскага зямяніна Мікалая Фёдаравіча Гайкі.

Пачаў кар'еру ў 1530-х са службы пры двары віленскага кашталяна Юрыя Радзівіла. У 1536 ездзіў паслом ад Радзівіла ў Маскву да князя Абаленскага. У 1546 каралеўскі дваранін. Пазней пісар рускі пры двары вялікай княгіні літоўскай і каралевы польскай Барбары Радзівіл. З 1554 канюшы гарадзенскі, адначасова ў 1554—1566 вялікі пісар ВКЛ (належаў да вузкага кола службоўцаў унутры дзяржаўнай канцылярыі, якое займалася вядзеннем Метрыкі ВКЛ), ключнік віленскі з 1556, маршалак гаспадарскі ў 1564—1566, кашталян берасцейскі з 1566.

У 1552 пасланы соймам ВКЛ з лістом да маскоўскіх баяр. У 1556 удзельнічаў у Вільні ў перамовах з царскімі пасламі, якія прыехалі да Жыгімонта Аўгуста. Член пасольства Васіля Тышкевіча 1558—1559, якое прывезла ў Маскву мірныя прапановы.

Гайка быў прыхільнікам Жыгімонта Аўгуста і яго палітыкі па заключэнні дзяржаўнай уніі паміж ВКЛ і Польшчай. У 1565 член пасольства ВКЛ на чале з Астафіем Валовічам, якое было паслана на польскі сойм у Пётркаў, каб весці перамовы пра арганізацыю сумеснага сойма і польскую ваенную дапамогу ВКЛ. У 1566 удзельнічаў у пасольстве ад сойма ВКЛ у Берасці да польскага сойма ў Любліне. Падпісаў акт Люблінскай уніі 1569.

Быў прыхільнікам Радзівілаў (асабліва Мікалая Радзівіла Рудога) у час першых 2 міжкаралеўяў, прымаў удзел у большасці шляхецкіх з'ездаў з удзелам Рудога.

Трымаў шматлікія дзяржаўныя маёнткі, быў дзяржаўцам ашмянскім з 1555, вількійскім, уцянскім, краснасельскім, трабскім.

Крыніцы

• Гайка Ян Мікалаевіч // Вялікае княства Літоўскае: Энцыклапедыя. У 3 т.. — Мн.: Беларуская Энцыклапедыя.