Дай дарогу!

Дай дарогу!
Дай дарогу! на Atlas Weekend 2016
Асноўная інфармацыя
Жанр	панк-рок
Гады	1998-па сённяшні дзень
Краіна	Беларусь
Горад	Брэст
Адкуль	Брэст
Мова песень	руская, беларуская, польская
Склад	Юрый Стыльскі, Аляксандр Закржэўскі, Ілля Церашчук, Андрэй Белы
Іншыя праекты	4 Kuba, Zolki Band
Медыяфайлы на Вікісховішчы

Дай дарогу! — беларускі панк-рок гурт. Утвораны ў 1998 годзе ў Брэсце.

Лаўрэат прэмій «Даём рады» (Еўрарадыё, Мінск) у намінацыях «Гурт года» і «Альбом года» ў 2012 годзе, уладальнік персанальнай узнагароды ад мінскага клуба RE:PUBLIC у намінацыі «Самы шалены канцэрт» у 2012 годзе, пераможца «Добробаттл» (па выніках інтэрнэт-галасавання) на «Доброфест 2014», лаўрэат прэміі Rock Profi 2015 у намінацыі «Артыст года».

Гісторыя

Гурт на канцэрце Салідарныя з Беларуссю 26 кастрычніка 2019 года ў Варшаве

.

Гурт «Дай дарогу!» створаны ў маі 1998 года ў Брэсце Юрыем «Кешей» Стыльскім (музыка, тэксты, гітара, вакал) і Васілём Капылавым (музыка, тэксты, вакал). Дэбютнае выступленне групы, якое адбылося 25 чэрвеня 1998 года ў кінаклубе «Паветра» (былы кінатэатр «1 Мая», размешчаны ў гістарычным цэнтры Брэста) на канцэрце памяці ахвяраў чэрвеньскага суіцыду, стала нечаканасцю як для арганізатараў мерапрыемства, так і для саміх музыкаў.

Вообще нас там никто не ждал. Просто мы сами встали, взяли инструменты, вышли без разрешения и отыграли свой сет. Не знаю, как нас люди поняли, но мы, покидая помещение, сами испытывали легкий шок. Это было круто! Юрый Стыльскі

Крыху пазней у групу запрашаецца Кірыл «Кириман» Скамьін (бас-гітара). У сярэдзіне ліпеня 1998 на «Green House Studio» з дапамогай Алега «Фёдора» Фядоткіна (ударныя) група запісвае дэбютны міні-альбом «Зарубило!», які складаецца з сямі кампазіцый. Неўзабаве гэты міні-альбом быў выпушчаны на аўдыёкасетах у фармаце спліта з дэмазапісам праекта Киндерсюрприз Алега «Патяма» Сцепанюка «Покупаем волосы».

У чэрвені 1999 года міні-альбом «Зарубило!» быў дапісаны да паўнавартаснага альбома. Запіс адбываўся ў абноўленым складзе, з ударнікам Анатолем Тадорскім з The Shkrobots.

У гэты ж час песня «Ехали мы, ехали» трапляе ў другі выпуск аудыёальманаха «Брест-рок-журнал». Акрамя таго, гэтая кампазіцыя прызнаецца хітом мінскай музычнай прэсай.

У жніўні 1999 ударнік Анатоль Тадорскі з'язджае з Брэста па размеркаванні і на яго месца ў групу «Дай дарогу!» прыходзіць Аляксандр «Смуга» Халадкоў. У гэты перыяд група выступае на канцэртных пляцоўках Брэста, раённых цэнтраў Брэсцкай вобласці, а таксама Бабруйска, а 21 студзеня 2001 года ў брэсцкім ДК Чыгуначнікаў на фестывалі «Алюминиевая зима» група прадстаўляе новую праграму «На морозе», якая паслужыла асновай для будучага альбома.

З восені 2001 года і па студзень 2002 года на «Green House studio» «Дай дарогу!» запісвае новы альбом «На морозе». Ад рэцэнзентаў альбом атрымлівае станоўчыя водгукі: «Уцяжараны брэсцкі рок, у якім можна наскрэбці, да прыкладу, панк з хардкорам. Вельмі добры рок, смею вас запэўніць. Драйвова сыграна, хутка, умела, чалавечыя тэксты — і ўсміхнуцца ёсць дзе і падумаць».

У чэрвені 2002 года з групы сыходзіць Васіль Капылаў.

У 2002-2003 гадах кліпы на песні «На Ямайке» і «Она не знала» трапляюць у хіт-парад «Клип-обойма» на рэспубліканскім тэлебачанні. Такім чынам творчасць групы становіцца больш даступнай масавай аўдыторыі і знаходзіць пэўны водгук: кліп «На Ямайке» на працягу доўгага часу трымаецца на другім месцы.

8 чэрвеня 2003 года гурт выступае ў брэсцкім кінатэатры «Мір» з новай праграмай, якая ўжо ўяўляла сабой паўнавартаснае шоў з візуальным суправаджэннем. На гэтым канцэрце адбываецца знаёмства музыкаў з будучым дырэктарам «Дай дарогу!» Яўгенам Круком.

14 чэрвеня 2003 года на маскоўскім лэйбле «Real Records» выходзіць зборнік «Бешеные бабки», куды трапляе кампазіцыя «Дай дарогу!» «На Ямайке» (разам з песнямі груп Кирпичи, Ленинград, МультFильмы і інш.).

У 2004 годзе ў групу вяртаецца Алег Фядоткін.

Зімой 2004 года на прафесійным лэйбле GO-Records выходзіць трэці альбом гурта пад назвай «20 см», які атрымаў распаўсюджванне ў трох версіях: «Для папы» (змяшчае ненарматыўную лексіку), «Для мамы» (на запісе прысутнічаюць выключна цэнзурныя варыянты песень) і «Для фанов» (змяшчае песню «Сане»). Упершыню прэзентацыя альбома брэсцкай групы праходзіць у мінскім клубе «Рэактар». Альбом «20см» вельмі прыхільна быў успрыняты як крытыкамі, так і слухачамі: з яго выхадам істотна ўзрастае папулярнасць групы.

У 2004 годзе з групай пачынае супрацоўнічаць удзельнік промагрупы «BrestCity-Hardcore» Яўген Крук, які ўзяў на сябе абавязкі адміністратара і тур-мэнэджэра «Дай дарогу!». Шмат у чым дзякуючы яго намаганням геаграфія выступленняў калектыву значна пашыраецца.

У 2005 годзе выходзіць першы акустычны альбом гурта «Акустика-1».

У 2007 годзе група выпускае зборнік сваіх лепшых песень пад назвай «Supersession».

У 2008 годзе адбылося першае выступленне групы на тэрыторыі Расійскай Федэрацыі ў рамках мота-фестывалю ў падмаскоўным горадзе Фразіна, і з тых часоў «Дай дарогу!» становіцца пастаянным удзельнікам гэтага open-air.

У 2011 годзе выходзіць другі акустычны альбом «Боли нет», які ўключае ў сябе бонус-версію загалоўнай песні, якую лідар гурта «Дай Дарогу!» Юрый Стыльскі выконвае разам з Сяргеем Міхалком (ex-Ляпіс Трубяцкі, Brutto).

У 2012 годзе выходзіць альбом «Сквозь говно». Пасля яго запісу з групы сыходзіць ударнік Алег Фядоткін, месца якога за барабаннай устаноўкай займае Ігар Гусеў. Альбом высока ацэнены крытыкамі і па выніках года «Дай дарогу!» становіцца лаўрэатам прэмій «Даём рады» (Еўрарадыё, Мінск) у намінацыях «Гурт года» і «Альбом года», а таксама ўладальнікам персанальнай ўзнагароды ад мінскага клуба RE:PUBLIC у намінацыі «Самы шалены канцэрт».

У канцы 2013 года гурт пакідае бас-гітарыст Кірыл Скамьін, на змену якому прыходзіць Аляксандр Закржэўскі. Да гэтага часу «Дай дарогу!» становіцца вядучай групай і адным з галоўных фестывальных хедлайнераў Беларусі, а ў родным Брэсце - бясспрэчным канцэртным лідарам.

У 2014 годзе гурт пачынае актыўна выступаць на тэрыторыі Расійскай Федэрацыі (у прыватнасці, становіцца ўдзельнікам фестываляў «Нашествие-2014» і «Доброфест-2014»).

У канцы 2014-пачатку 2015 года група адзначае дзесяцігоддзе альбома «20 см» вялікім турам па беларускіх гарадах.

У пачатку 2015 года «Дай дарогу!» пачынае працаваць з новым барабаншчыкам Іллёй Церашчуком і прыступае да запісу аднайменнага альбома, прэзентаванага 8 мая 2015 у клубе Re:Public.

У 2016 годзе група праводзіць міні-тур па гарадах Расіі сумесна з Noize MC.

У пачатку лета 2016 група «Дай дарогу!» увайшла ў «Топ-5 самых папулярных фестывальных груп Украіны» (па версіі аўтарытэтнага білетнага распаўсюдніка Karabas і інтэрнэт-выдання Neformat), апярэдзіўшы Бумбокс, Ріаnобой, Скрябін і многіх іншых украінскіх выканаўцаў.

У 2016 годзе гурт выпускае беларускамоўны сінгл «Я веру», ужо праз год быў прэзентаваны кліп на гэтую песню.

Дыскаграфія

• 1999 — Зарубило!
• 2002 — На морозе!
• 2004 — 20 см
• 2005 — Акустика-1
• 2006 — Supersession
• 2008 — Д.С.П.Г.
• 2011 — Боли нет
• 2012 — Сквозь говно
• 2013 — Велоакустика, часть 1
• 2014 — Велоакустика, часть 2
• 2015 — Дай дарогу!

Склад

Актуальны склад

• Юрый Стыльскі — вакал, гітара, тэксты, музыка
• Аляксандр Закржэўскі — бас-гітара, бэк-вакал
• Ілля Церашчук — ударныя
• Андрэй Белы — сола-гітарыст

Тэхнічны склад

• Яўген Крук — дырэктар
• Уладзімір «Jodov» Кивачук — рэжысёр відэа
• Павел «SlowMo» Малашонок — фатограф

Былыя ўдзельнікі

• Ігар Гусеў — ударныя (2012-2015)
• Кірыл Скамьін — бас-гітара, бэк-вакал (1998-2013)
• Васіль Капылаў — вакал, тэксты, музыка (1998-2002)
• Алег Фядоткін — ударныя (1998, 2004-2012)
• Аляксандр Халадкоў — ударныя (1999-2004)
• Анатоль Тадорскі — ударныя (1999)

Відэаграфія

• 2009 — кліп «На Ямайцы», упершыню паказаны ў праграме Беларускага тэлебачання (БТ) «Клип-обойма».
• 2009 — кліп «Самородок», зняты 27 чэрвеня 2009 на тэрыторыі жаночага футбольнага клуба «Виктория-86» (Брэст), інтэрнэт-прэзентацыя адбылася 29 ліпеня 2009.
• 2009 — кліп «День-ночь», ролік на з'явіўся ў падтрымку новага альбома «Д.С.П.Г.», які выйшаў восенню 2008 года на GO-Records. Упершыню прадстаўлены ў Расіі на тэлеканале «А1» («Першы альтэрнатыўны»).
• 2009 — кліп «Тома», прэзентаваны на расійскім «А1» («Першы альтэрнатыўны») і ўкраінскім Inter-Tv.
• 2011 — кліп «Температура», першы "даўгабуд" у відэатэцы Дай дарогу!. На стварэнне кліпа сышоў амаль цэлы год: летам 2010 года знялі дэбютныя кадры ў макавым полі (іх у выніку засталося каля 5% ад агульнай працягласці відэа), восенню здымалі гісторыю, зімой і вясной - музыкаў, усё лета 2011 сышло на мантаж і спецэфекты. За тыдзень да прэм'еры (04.10.2011) фронтмэн Юрый Стыльскі перапісаў сола. Галоўную ролю выканала мадэль Паліна Ціолта.
• 2014 — кліп «Танкист», прэзентаваны 8 мая 2014, прысвечана гульцам у World of Tanks. Галоўную ролю ў відэакліпе сыграў Сяргей Абухоў.
• 2015 — кліп «Отравлены мозги». Здымкі праходзілі яшчэ ў 2012 годзе, у выніку да моманту прэзентацыі кліпа з музыкаў, якія прынялі ўдзел у здымках, застаўся толькі фронтмэн Юрый Стыльскі.
• 2017 — кліп «Не веру». Першы кліп на беларускамоўную песню.

Цікавыя факты

• У альбоме «На марозе» можна пачуць кампазіцыі на трасянке («Баба-Гром») і польскай («Chlopaki Z Terespolu») мовах. З апошняй песняй Дай дарогу! практычна штогод выступаюць на дне горада Цярэспаль (Польшча).
• На канале гурта «Дай дарогу!» на YouTube у серыі 5-хвілінных відэаролікаў «Дай дарогу!-TV» лідар гурта Юрый Стыльскі дае відэаадказы на самыя папулярныя пытанні фанатаў і распавядае пра жыццё групы.
• Акрамя гурта Дай дарогу! Юрый Стыльскі з'яўляецца заснавацелем электроннага праекта «4 Kuba».

Спасылкі

• Дай дарогу! на YouTube
• Суполка Вконтакте
• Старонка на Facebook
• Дай дарогу! у Instagram