Медаль да стагоддзя БНР

Медаль 100 гадоў БНР
Краіна	БНР
Тып	медаль
Каму ўручаецца	ваенным і грамадскім дзеячам
Дата заснавання	25 снежня 2018
Статыстыка ўзнагароджанняў
Першае	18 лютага 2019
Колькасць	больш за 130
Старэйшая	Ордэн Пагоні

Медаль 100 гадоў БНР — узнагарода Рады Беларускай Народнай Рэспублікі, зацверджаная 25 снежня 2018 года. Агулам медалём узнагароджаныя больш за 130 асоб з Беларусі і замежжа.

Згодна са сваім статутам, медаль уручаецца за пажыццёвыя заслугі ў працы дзеля здзяйснення ідэалаў Акта 25 сакавіка 1918 г., у тым ліку за даследаванні і папулярызацыю беларушчыны, здабыццё і ўмацаванне дзяржаўнай незалежнасці Беларусі, барацьбу за свабоду і дэмакратыю ў Беларусі.

Медаль уручаецца:

• Асобам, якія адзначыліся на ніве змагання за волю і незалежнасць Беларусі,
• Выбітным грамадскім і культурніцкім дзеячам у Беларусі і сярод беларускага замежжа,
• Замежнікам, якія спрычыніліся да даследаванняў і папулярызацыі Беларусі ў свеце, а таксама іншым чынам спрыялі нацыянальным інтарэсам Беларусі.

Апісанне

Медаль выраблены з бронзы, мае круглую форму дыяметрам 38,61 мм.

На аверсе выбітыя выява герба «Пагоня», скрыжаваныя дубовыя галінкі і надпіс «Рада Беларускай Народнай Рэспублікі».

Рэверс

На рэверсе выбіты надпіс: «100 гадоў БНР», даты «1918» і «2018», лаўровы вянок і беларускі шасціканцовы крыж.

Стужка медаля складаецца з вертыкальных палосаў наступных колераў і размешчаных у наступным парадку: шырокая белая, вузкая чорная, шырокая чырвоная, вузкая чорная, шырокая белая. Наверсе стужкі замацаваная бронзавая планка з надпісам «B.N.R.» Шырыня стужкі — 34 мм.

Да медаля дадаецца афіцыйны дыплом на беларускай мове або на беларускай і англійскай мовах.

Узнагароджаныя

У. Арлоў узнагароджвае Б. Пятровіча медалём «100 гадоў БНР» ад імя старшыні Рады БНР Івонкі Сурвілы

Агулам узнагароджаныя больш за 130 асоб з Беларусі і замежжа. Сярод іх палітыкі і грамадскія дзеячы; ветэраны беларускага незалежніцкага руху і палітычныя вязні.

• Уладзімір Арлоў — беларускі пісьменнік
• Алесь Бяляцкі — беларускі грамадскі дзеяч, праваабаронца
• Радзім Гарэцкі — акадэмік НАН Беларусі
• Джым Дынглі — брытанскі славіст, даследчык беларускай гісторыі і літаратуры
• Арнольд Макмілін — брытанскі славіст, даследчык беларускай літаратуры
• Адам Мальдзіс — беларускі літаратуразнавец, гісторык, пісьменнік, журналіст
• Аляксей Марачкін — беларускі мастак, сябра аргкамитэта БНФ (1988)
• Уладзімір Някляеў — беларускі паэт, грамадска-палітычны дзеяч, намінант на Нобелеўскую прэмію
• Наталля Радзіна — беларускі журналіст, рэдактарка Хартыі 97
• Дэвід Суорц — першы амбасадар ЗША ў Беларусі
• Леў Талбузін — беларускі дызайнер, скульптар
• Юрый Туронак — беларускі гісторык
• Аляксандр Шатэрнік – беларускі скульптар
• Стэфан Эрыксан — амбасадар Швецыі ў Беларусі

і інш.

Гл. таксама

• Узнагароды БНР

Спасылкі

• Прэс-рэліз аб узнагароджанні медалём да 100-годдзя БНР, сайт Рады БНР
• У Вільні ўручаныя мэдалі Рады БНР дзеячам зь Беларусі (бел. (тар.)) // svaboda.org 24 лістапада 2019