Віа дэі Форы Імперыялі

Віа дэі Форы Імперыялі

Фашысцкі ваенны парад на Віа дэль Імпера

Віа дэі Форы Імперыялі (Via dei Fori Imperiali, першапачаткова Via dell’Impero) — шырокі праспект у цэнтры Рыма ад П’яцца Венецыя да Калізея, пабудаваны ў 1932 годзе па загадзе Беніта Мусаліні. Прамая вуліца шырынёй 30 і даўжынёй 850 м аддзяляе асноўны рымскі форум ад імператарскіх форумаў. Знаходзіцца ў раёне Монці.

Гісторыя

Аж да Сярэднявечча на месцы сучаснага праспекта знаходзіліся руіны антычных збудаванняў, але потым былі збудаваны хрысціянскія цэрквы і кляштары. У канцы XVI стагоддзя па загадзе кардынала Мікеле Банелі, які нарадзіўся ў Александрыі, гэта тэрыторыя была кардынальна перабудавана. Створаны тут квартал атрымаў назву Александрыйскага (Alessandrino).

Сучасная вуліца была пракладзена ў 1924—32 гг. па-над раскопкамі антычных імператарскіх форумаў (Траяна, Аўгуста, Нервы), часткова разваліны форумаў можна бачыць па баках вуліцы. Пры будаўніцтве былі разбураны пастамент статуі-калоса Нерона і руіны антычнага фантана. Працы суправаджаліся поўным разбурэннем квартала, які знаходзіўся тут раней. Па ідэі Мусаліні Віа дэі Форы Імперыялі павінна была сімвалічна злучаць Калізей з Плошчай Венецыі — цэнтрам новай фашысцкай імперыі. Адкрыццё пад назвай вуліцы Імперыі (via dell’Impero) адбылося 9 красавіка 1932 года.

Пасля заканчэння Другой сусветнай вайны вуліца была пераназвана ў Віа дэі Форы Імперыялі. Кожны год 2 чэрвеня тут праводзіцца ваенны парад у гонар Дня Італьянскай Рэспублікі. З 1980-х гадоў не раз уздымалася пытанне аб ліквідацыі вуліцы, з прычыны таго, што яна падзяляе на дзве часткі археалагічную зону і замінае раскопкам. У наш час Віа дэі Форы Імперыялі адкрыта для аўтамабільнага транспарту і толькі па нядзелях ператвараецца ў пешаходную зону.

Літаратура

• Henze, Anton. Kunstführer Rom. — Stuttgart: Reclam, 1994. — ISBN 3-15-010402-5.
• Sovraintendenza Comunale ai Musei Gallerie Monumenti e Scavi, Gli anni del Governatorato (1926—1944), Collana Quaderni dei monumenti, Roma, Edizioni Kappa, 1995. ISBN 88-7890-181-4:
• Silvana Rizzo Medugno, Archeologia e arredo urbano in via dei Fori Imperiali tra il 1870 e il 1945, pp. 47-52.
• Valter Vannelli, Le case dei Mercati Traianei tra la piazza del Foro, via Alessandrina e via di Campo Carleo: premesse su via dei Fori Imperiali, pp. 25-38.

Спасылкі

• На Вікісховішчы ёсць медыяфайлы па тэме Віа дэі Форы Імперыялі