Перуджа (італ.: Provincia di Perugia) — правінцыя ў Італіі, у рэгіёне Умбрыя. Правінцыя Перуджа размешчана ў цэнтральнай частцы дзяржавы і займае паўночную і цэнтральную частку Умбрыі. Па Перуджы праходзіць рака Тыбр. У гэтай вобласці растуць вінаград і алівы. Тут знаходзіцца самае вялікае возера цэнтральнай Італіі, Тразіменскае возера, на якім размешчана тры астравы — Палвезэ, Маджорэ і Мінорэ. Возера ў акружнасці мае каля 30 міль, аднак дастаткова мелкаводнае.