Беларускае культурнае таварыства «Грунвальд»
| Беларускае Культурнае Таварыства «Грунвальд» | |
|---|---|
| Тып | грамадскае аб’яднанне |
| Год заснавання | студзень 1990 г. |
| Размяшчэнне | Талін, Эстонія |
| Ключавыя фігуры | Валерый Чыжык |
| Сфера дзейнасці | адраджэнне беларускай нацыянальнай культуры, аб'яднанне беларусаў Эстоніі |
Беларускае Культурнае Таварыства «Грунвальд» — добраахвотная грамадская арганізацыя беларусаў Эстоніі.
Гісторыя[правіць | правіць зыходнік]
Таварыства было зарэгістравана пры Эстонскім фондзе культуры ў студзені 1990 г. інжынерам Эстонскага тэатра драмы Валерыем Чыжыкам. Тады ж тыражом 25 000 асобнікаў быў апублікаваны першы нумар інфармацыйнага бюлетэня «Грунвальд». Мэтай выдання было «даць максімум інфармацыі беларусам Эстоніі аб падзеях у Беларусі, садзейнічаць нацыянальна-культурнаму адраджэнню, дапамагчы ў вывучэнні беларускай мовы». У далейшым меркавалася павялічыць у два разы тыраж і выпускаць бюлетэнь двойчы на месяц.
У інтэрв'ю газеце «Савецкая Эстонія» Чыжык адзначаў, што Таварыства працавала «ў самым цесным кантакце» з Народным фронтам, Саюзам пісьменнікаў, Саюзам кінематаграфістаў, ТБМ, Купалаўскім тэатрам, вядомымі гісторыкамі і пісьменнікамі. Прадстаўнікі Таварыства, па словах Чыжыка, удзельнічалі у мерапрыемствах Народнага фронту, у тым ліку Чарнобыльскім шляху. планавала наладзіць сувязь паміж беларусамі ў розных гарадах Эстоніі, а таксама ўстанавіць сувязі з суайчыннікамі за мяжой[1].
26 красавіка 1990 г., у гадавіну Чарнобыльскай катастрофы, Таварыства арганізавала акцыю «гадзіна нацыянальнага трауру» на Ратушнай плошчы Таліна[2].
У кастрычніку 1990 г. Таварыства надрукавала тыражом 27 500 асобнікаў скарочаную версію брашуры «Кароткі агляд гісторыі Беларусі для беларускіх дадатковых школ», выпушчанай у 1968 г. у ЗША[3]. Сродкі ад яе рэалізацыі планавалася перадаць дзецям Беларусі і Расіі, якія пацярпелі ад чарнобыльскай аварыі, а таксама дзіцячым арганізацыям Эстоніі[4].
Таварыства налічвала каля 100 сталых чальцоў[5].
Зноскі[правіць | правіць зыходнік]
- ↑ Пельс Р. «Грунвальд» — газета на белорусском языке // Советская Эстония. № 25 (31.01.1990). С. 4.
- ↑ Валуй Л. Беларусь на кресте! // Советская Эстония. № 97 (26.04.1990). С. 3.
- ↑ Кароткі агляд гісторыі Беларусі для беларускіх дапаўняльных школ. Улажыў П. Рагач. Кліўленд — Нью-Ёрк — Талін, 1990. — 94 с.
- ↑ Советская Эстония. № 234 (11.10.1990). С. 4.
- ↑ Самодеятельные общественные и политические организации и движения в СССР. М., 1992. С. 114.