Навука (газета)
| «Навука» | |
|---|---|
| Тып | газета |
| Выдавец | Навука і тэхніка |
| Заснавана | 24 кастрычніка 1979 |
Газета «Навука» — навуковая, вытворча-практычная газета Беларусі. Заснавальнік Нацыянальная акадэмія навук Беларусі, выдавец Выдавецкі дом «Беларуская навука».
Першы нумар газеты пад назвай «За перадавую навуку» выйшаў 24 кастрычніка 1979 года. На сваіх старонках ведамасная шматтыражка асвятляла не толькі пытанні дзейнасці Акадэміі навук і яе арганізацый, але і расказвала аб выніках даследаванняў, навінках, дасягненнях і навуковых адкрыццях, публікавала біябібліяграфічныя нарысы да юбілеяў вучоных.
На пасяджэнні Бюро Прэзідыума акадэміі 29 красавіка 1990 года было прынятае рашэнне змяніць статус выдання. З таго часу яно лічыцца рэспубліканскай ведамаснай газетай Акадэміі навук БССР. Назва таксама была зменена на «Навіны Беларускай Акадэміі».
У лютым 1996 года ў сувязі з ліквідацыяй акадэмічнага выдавецтва «Навука і тэхніка», у структуры якога была рэдакцыя газеты, пастановай Бюро Прэзідыума Акадэміі навук апошняя са штатам 10 чалавек была перададзена ў вядзенне Кіраўніцтва справамі акадэміі. Потым з 1 красавіка таго ж года са стварэннем рэдакцыйна-выдавецкага аддзела ў структуры Аддзела навуковай інфармацыі па гуманітарных навуках рэдакцыя газеты была ўключана ў гэты аддзел. У другой палове 1997 года выданне «Навіны Акадэміі навук Беларусі» было спынена, а яе пераемніцай стала рэспубліканская навуковая інфармацыйна-аналітычная газета «Веды», заснавальнікамі якой сталі АН Беларусі і Дзяржкамітэт па навуцы і тэхналогіях.
У канцы мая 1996 года пастановай Прэзідыума Акадэміі навук на базе рэдакцыйна-выдавецкага Аддзела навуковай інфармацыі па гуманітарных навуках АН Беларусі было створана выдавецтва «Беларуская навука». Аднак у канцы мая 2000 года Бюро Прэзідыума НАН Беларусі, абмеркаваўшы пытанне аб газеце «Веды», прыняло рашэнне перадаць рэдакцыю са структуры выдавецтва «Беларуская навука» ў склад Аналітычнага цэнтра НАН Беларусі. Са стварэннем у сістэме Акадэміі рэдакцыйна-выдавецкай установы «Навука і інавацыі» рэдакцыя газеты «Веды» пастановай Бюро Прэзідыума НАН Беларусі з 1 сакавіка 2003 года была выведзена са складу Аналітычнага цэнтра і ўключана ў рэдакцыйна-выдавецкую ўстанову «Навука і інавацыі».
У лютым 2005 года Бюро Прэзідыума Акадэміі з мэтай павышэння эфектыўнасці рэдакцыйна-выдавецкай дзейнасці прыняло рашэнне рэарганізаваць "Выдавецтва «Беларуская навука» шляхам далучэння да яго рэдакцыйна-выдавецкай установы «Навука і інавацыі» і перайменаваць яго ў РУП "Выдавецкі дом «Беларуская навука» з вызначэннем яму асноўных напрамкаў дзейнасці, адным з якіх з’яўляецца забеспячэнне падрыхтоўкі і выпуску акадэмічных перыядычных выданняў. . Газета «Веды» стала падраздзяленнем РУП "Выдавецкі дом «Беларуская навука».
31 сакавіка 2015 года Прэзідыум НАН Беларусі пастанавіў змяніць назву газеты на новую — «Навука» і выступіць яе заснавальнікам, вывеўшы са складу заснавальнікаў Дзяржаўны камітэт па навуцы і тэхналогіях Рэспублікі Беларусь. РУП "Выдавецкі дом «Беларуская навука», на якое ўскладзены функцыі рэдакцыі газеты «Веды», перарэгістравала газету з новай назвай у адпаведнасці з дзеючым заканадаўствам.
Сёння асноўная ўвага ў тэматычнай накіраванасці газеты «Навука» сканцэнтравана на асвятленні дзяржаўнай палітыкі ў галіне навуковай і навукова-тэхнічнай дзейнасці ў нашай краіне, інавацыйнага развіцця, міжнароднага навукова-тэхнічнага супрацоўніцтва, даследаванняў, якія праводзяцца ў акадэмічных і галіновых навуковых арганізацыях, а таксама ўстановах адукацыі па прыярытэтных напрамках развіцця навукі, гісторыі беларускай навукі. Акрамя таго, робяцца акцэнты на публікацыях аб персаналіях навуковай супольнасці (даследчык-сучаснік, яго погляды, навуковы аўтарытэт, уклад у навуку і народную гаспадарку), аб ролі моладзі ў развіцці сучаснай навукі. Падаецца аператыўная інфармацыя аб мерапрыемствах і выніках дзейнасці арганізацый і структурных падраздзяленняў НАН Беларусі, а таксама асвятляюцца пытанні навукова-прамысловай сферы, камерцыялізацыі навуковых ідэй, эфектыўнасці выкарыстання навуковага патэнцыялу краіны.