Дзмітрый Васільевіч Дзятко

Дзмітрый Васільевіч Дзятко
Дата нараджэння	18 студзеня 1981(1981-01-18) (43 гады)
Месца нараджэння	Мінск, БССР, СССР
Грамадзянства	Беларусь
Род дзейнасці	мовазнавец, выкладчык універсітэта
Навуковая сфера	мовазнаўства
Месца працы	БДПУ
Навуковая ступень	доктар філалагічных навук
Навуковае званне	прафесар
Альма-матар	БДПУ
Навуковы кіраўнік	П. А. Міхайлаў, В. Д. Старычонак
Вядомыя вучні	С. У. Шахоўская, В. М. Лухверчык

Дзмітрый Васільевіч Дзятко (нар. 18 студзеня 1981 года, Мінск, БССР, СССР) − беларускі мовазнавец і педагог.

Доктар філалагічных навук (2023), прафесар (2023).

Біяграфія

Скончыў Беларускі дзяржаўны педагагічны ўніверсітэт імя Максіма Танка (БДПУ) у 2003 годзе. Спецыяліст у галіне беларускай мовы і літаратуры, сусветнай і айчыннай культуры. Выпускнік аспірантуры БДПУ (у форме саіскальніцтва, 2007) і дактарантуры БДПУ (2021).

Тэма кандыдацкай дысертацыі: «Фарміраванне і склад беларускай матэматычнай тэрміналогіі» (абаронена ў 2007 г. у Інстытуце мовазнаўства імя Якуба Коласа НАН Беларусі). Тэма доктарскай дысертацыі: «Беларуская лінгвістычная тэрмінаграфія: генезіс, структура, тыпалогія» (абаронена ў 2022 г. у Інстытуце мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі).

Заснавальнік тэорыі беларускай лінгвістычнай тэрмінаграфіі.

Педагагічная праца

З 2003 года працуе ў Беларускім дзяржаўным педагагічным універсітэце імя Максіма Танка. З 2009 г. да 2018 г. — загадчык кафедры беларускага мовазнаўства. З 2018 г. — загадчык кафедры мовазнаўства і лінгвадыдактыкі. Выкладае дысцыпліны «Агульнае мовазнаўства», «Уводзіны ў мовазнаўства», «Беларускае мовазнаўства», «Гісторыя лінгвістыкі», «Стараславянская мова», «Гісторыя беларускай мовы», «Метадалогія лінгвістычных вучэнняў», «Асновы лінгвістычных даследаванняў» і інш. У 2009 г. прысвоена вучонае званне дацэнта, у 2023 г. — прафесара.

Стажыраваўся ў Беларускім дзяржаўным універсітэце (Беларусь), Інстытуце лінгвістычных даследаванняў РАН (Расія), Універсітэце імя Канстанціна Філосафа (Славакія), Віцебскім дзяржаўным універсітэце імя П. М. Машэрава (Віцебск) і іншых.

Навуковае прадстаўніцтва

• навуковы кансультант часопіса «Роднае слова»;
• член рэдкалегіі часопіса «Весці БДПУ. Серыя 1»;
• член рэдкалегіі часопіса «Slavica Nitriensia» (Славакія);
• член рэдкалегіі часопіса «Сибскрипт» (РФ);
• навуковы рэцэнзент часопіса «ECNU Review of Education» (КНР);
• член навуковага савета энцыклапедыі «Культура Беларусі»;
• член рэспубліканскай тэрміналагічнай камісіі пры Нацыянальнай акадэміі навук Беларусі;
• вучоны сакратар Савета па абароне дысертацый К 02.21.01 пры БДПУ.

Навуковыя інтарэсы

Спецыяліст у галіне беларускай лексікаграфіі і тэрмінаграфіі, тэрміназнаўства, гісторыі мовазнаўства, сучаснай беларускай літаратурнай мовы. Распрацаваў новы інтэрдысцыплінарны напрамак – тэорыю сістэмнай арганізацыі і параметрызацыі беларускай лінг­ві­стыч­най тэрмінасферы, прапанаваў і абгрунтаваў канцэпцыю вывучэння і апі­сан­ня беларускага металінгвістычнага канты­ну­ума.

Аўтар больш за 330 навуковых публікацый.

Асноўныя публікацыі

• «Беларуская матэматычная тэрміналогія: станаўленне, структура, функцыянаванне: манаграфія» (Мн., 2009, 192 с.);
• «Беларускае мовазнаўства: дысертацыі па беларускай мове, абароненыя ў Рэспубліцы Беларусь (1990—2011 гг.): навуковы даведнік Архівавана 19 чэрвеня 2023.» (суаўт. С. У. Шахоўская; Мн., 2011, 400 с.);
• «Мовазнаўцы: нарысы па гісторыі беларускай лінгвістыкі» (суаўт. П. А. Міхайлаў; Мн., 2017, 496 с.);
• «Беларуская лінгвістычная тэрмінаграфія: манаграфія» (Мн., 2022, 340 с.);
• «Беларуская лінгвістычная тэрмінаграфія: генезіс, структура, тыпалогія: манаграфія» (2-е выд., дап.: Рыга, 2022, 739 с.; 3-е выд., перапрац. і дап.: Рыга, 2022, 773 с.);
• «Беларуская лінгвістычная тэрмінаграфія: слоўнік» (Мн., 2022, 206 с.);
• «Беларуская лінгвістычная тэрмінаграфія: манаграфія» (Рыга, 2023, 780 с.) і інш.