Надмагіллі сабак Ф. І. Паскевіча (Гомель)

Надмагіллі сабак Ф. І. Паскевіча — два вялікія камяні з высечанымі мянушкамі сабак на правым верхнім беразе колішняй рэчкі Гамяюк у Гомелі. Знаходзяцца ў межах Гомельскага палацава-паркавага ансамбля. Усталяваныя ў 1890 г. з волі ўладальніка гомельскага маёнтка Ф. І. Паскевіча^[1]^[2].

Грунтоўна ўкапаныя ў зямлю. Пляцоўка навокал забрукаваная. Надпісы знаходзяцца ў простакутных выемках, зробленых зверху кожнага каменя. Камяні арыентаваныя надпісамі на поўдзень. На левым — надпіс «Марко», на правым — «Лордъ». Першапачаткова камянёў было тры. На зніклым камені значылася «Плутонъ». Надпісы адпавядаюць мянушкам княжацкіх хартоў, якія, згодна з абыходкавай версіяй, загінулі праз неасцярожнасць служкі на псярні, за што апошні, нібыта, паплаціўся жыццём^[3]. За адсутнасцю дакладных звестак падобнага кшталту версіі варта лічыць легендарнымі.

Сярод іншых сюжэтаў гарадскога фальклору ў гэтай сувязі варта згадаць расказы пра:

пышнае пахаванне, быццам бы зладжанае для сабак, што загінулі^[3]^[4];
тое, што пры жыцці сабакі ахоўвалі ад старонніх цікаўнікаў гомельскі парк як прыватную тэрыторыю^[4];
здані сабак, якія дагэтуль па начах сцерагуць палац і чакаюць свайго гаспадара^[5].

Вобразы Лорда, Марка і іх гаспадара ўвасобіліся ў скульптурнай кампазіцыі В. К. Далгова «Шпацыр з хартамі», усталяванай у 2015 г. каля Ніжняга моста цераз Гамяюк^[6].