Грэлка

Грэлка або тэрмафор — прылада для сагравання часткі цела сухім цяплом з мэтай папярэджання пераахалоджвання, або для мясцовага лячэння цяплом. Найбольш распаўсюджаныя віды грэлак — герметычныя гумовыя ёмістасці, якія запаўняюцца гарачай вадой, электрычныя (электратэрмічныя) грэлкі, хімічныя грэлкі. У старажытнасці ў якасці грэлак часта ўжываліся ёмістасці (скураныя мяшкі, гліняныя і медныя пасудзіны) з гарачай вадой або з сыпкімі рэчывамі (крупой, соллю, пяском, попелам), а таксама нагрэтыя прадметы (камяні, цэгла). Падобныя самаробныя грэлкі працягваюць выкарыстоўвацца ў хатнім побыце і зараз.