Частата

Частата паказвае колькасць цыклаў перыядычнай з'явы за адзінку часу. У Сістэме СІ адзінкай частаты з'яўляецца герц (Гц), вызначаны як адзін цыкл у секунду. Перыяд – гэта працягласць аднаго цыкла перыядычнай з'явы, такім чынам, перыяд узаемна-адваротны частаце.

Вызначэнне і адзінкі

Для цыклічных працэсаў, такіх як вярчэнне, ваганні, ці хвалі, частата вызначаецца як колькасць цыклаў у адзінку часу.

У фізіцы і інжынерных дысцыплінах, такіх як оптыка, акустыка і радыё, частату звычайна пазначаюць лацінскай літарай f (эф) або грэчаскай літарай ν (ню).

У Сістэме СІ адзінкай частаты з'яўляецца герц (скарочана Гц). Назва дадзена ў гонар нямецкага фізіка Генрыха Герца. 1 Гц азначае, што падзея паўтараецца адзін раз за секунду.

Перыяд – звычайна пазначаецца T – гэта працягласць часу, за які адбываецца адзін цыкл, ўзаемна-адваротны частаце f:

$T=\frac{1}{f}$

Частата хваляў

Частата адваротна-прапарцыянальна даўжыні хвалі λ (лямбда). Частата f роўная фазавай хуткасці v, падзеленай на даўжыню хвалі λ:

$f=\frac{v}{\lambda}$

У прыватным выпадку электрамагнітных хваляў, якія ідуць праз вакуум, калі v = с, дзе c – хуткасць святла ў вакууме, гэты выраз мае выгляд:

$f=\frac{c}{\lambda}$

Калі хвалі ад манахраматычнай крыніцы святла ідуць з аднаго асяроддзя ў другое, іх частата застаецца дакладна такой жа, змяняюцца толькі даўжыня хвалі і яе хуткасць.