Яўген Пятровіч Пятраеў

Яўген Пятровіч Пятраеў
Дата нараджэння	11 лістапада 1931(1931-11-11) (92 гады)
Месца нараджэння	Алматы, КазАССР, РСФСР, СССР
Грамадзянства	СССР  Беларусь
Род дзейнасці	навуковец
Навуковая сфера	радыяхімія і радыяцыйная хімія
Месца працы	Радыевы інстытут імя В. Р. Хлопіна[d] хімічны факультэт БДУ Аб’яднаны інстытут энергетычных і ядзерных даследаванняў «Сосны»
Навуковая ступень	доктар хімічных навук (1974)
Навуковае званне	прафесар
Альма-матар	ЛДУ

Яўген Пятровіч Пятра́еў (нар. 11 лістапада 1931) — вучоны ў галіне радыяхіміі і радыяцыйнай хіміі, доктар хімічных навук (1974), прафесар (1976).

Біяграфія

Нарадзіўся ў горадзе Алматы (Казахстан). У 1954 годзе скончыў хімічны факультэт Ленінградскага дзяржаўнага ўніверсітэта і пачаў працу ў Радыевым інстытуце ў Ленінградзе. У 1961 годзе абараніў кандыдацкую дысертацыю. У 1964 годзе ўзначаліў аддзел радыяцыйнай хіміі Інстытута ядзернай энергетыкі Акадэміі навук БССР. У 1968—1995 гадах Я. П. Пятраеў у Беларускім дзяржаўным універсітэце. У 1968 годзе ўзначаліў наноў створаную кафедру радыяцыйнай хіміі на хімічным факультэце. Адначасова з 1978 года кіраваў лабараторыяй радыяцыйнай хіміі Навукова-даследчага інстытута фізіка-хімічных праблем, у 1981—1985 гадах займаў пасаду прарэктара ўніверсітэта. З 1986 года — загадчык лабараторыі радыяхіміі.

Навуковая дзейнасць

Навуковая дзейнасць Я. П. Пятраева ў галіне радыяцыйнай хіміі арганічных злучэнняў, геахіміі радыеактыўных элементаў, радыеаэкалогіі. Распрацаваў метад вызначэння канцэнтрацыі «гарачых» часціц у лёгкіх чалавека і ўстанавіў яе сувязь з забруджанасцю тэрыторыі плутоніем. Пад яго кіраўніцтвам выкананы і ўкаранёны шэраг распрацовак па радыяцыйна-хімічнай і хімічнай ачыстцы сцёкавых вод і выкідаў прамысловых прадпрыемстваў, створаны метады радыяцыйна-хімічнага сінтэзу амінакіслот, а-дыёлаў. Аўтар больш за 500 навуковых прац, у тым ліку 3 манаграфій. Атрымаў каля 100 аўтарскіх пасведчанняў на вынаходствы.

Пад кіраўніцтвам вучонага падрыхтаваны 29 кандыдацкіх і 1 доктарская дысертацыі. Прымаў удзел рабоце Савета па хіміі высокіх энергій Акадэміі навук СССР, Савета па выкарыстанні атамнай энергіі Акадэміі навук БССР, камісіі па прыкладной радыяцыйнай хіміі Дзяржаўнага камітэта па навуцы і тэхніцы пры Савеце Міністраў СССР, навукова-тэхнічнага савета Міністэрства хімічнай прамысловасці СССР, шэрагу праблемных саветаў Акадэміі навук БССР і вучоных саветаў Беларускага дзяржаўнага ўніверсітэта, з’яўляўся старшынёй бюро Усесаюзнага хімічнага таварыства імя Д. І. Мендзялеева. Ганаровы прэзідэнт фонду «Жыццё пасля Чарнобыля».

Сярод апублікаваных прац:

• Прикладная ядерная физика: учебное пособие / А. К. Красин, Е. П. Петряев, И. А. Савушкин. — Мн.: МГПИ, 1980.
• Радиационно-химическая очистка сточных вод и выбросных газов / Е. П. Петряев, В. И. Власова, И. А. Савушкин. — Мн.: Университетское, 1985.
• Радиационная химия бифункциональных органических соединений / Е. П. Петряев, О. И. Шадыро. — Мн.: Университетское, 1986.
• Радыяцыя, жыццё і навакольнае асяроддзе: вучэбны дапаможнік для 10―11-х класаў агульнаадукацыйных школ і прафтэхвучылішч / В. І. Гергалаў, Я. П. Пятраеў. — Мн.: Народная асвета, 1994.
• Радиация, жизнь и окружающая среда: учебное пособие для 10―11-х классов общеобразовательных школ и профтехучилищ / В. И. Гергалов, Е. П. Петряев. — Мн.: Народная асвета, 1994.

Літаратура

• Пятраеў Яўген Пятровіч // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 165. — 10 000 экз. — ISBN 985-11-0035-8. — ISBN 985-11-0216-4 (т. 13).

Спасылкі

• Петряев Евгений Петрович // История БГУ (руск.)
• История от середины XX в. и до наших дней Архівавана 16 студзеня 2021. (руск.) // Сайт хімічнага факультэта БДУ