Кус-кус (страва)

Кус-кус з гароднінай і нутам

Кус-кус, кускус (араб. كسكس) — крупы (і страва з іх), магрыбскага або берберскага паходжання. Як правіла, кускус гатуецца на аснове манных круп з цвёрдай пшаніцы (Triticum durum). Часам кускусам завуць таксама крупы, вырабленыя з іншых злакаў, а таксама стравы з іх. Дыяметр макулінак - каля 1 мм.

Распаўсюджанне

Кус-кус з'яўляецца адным з асноўных прадуктаў харчавання ў Магрыбе, у прыватнасці ў Марока, Алжыры, Тунісе і Лівіі. Таксама распаўсюджаны ў іншых частках Афрыкі, у Францыі, сіцылійскай правінцыі Трапані ў Італіі і некаторых рэгіёнах Блізкага Усходу.

Вытворчасць

Кускус вырабляецца з больш дробнай маннай крупы. Манныя крупы апырскваюцца вадой, затым з атрыманай масы фармуюцца макулінкі, якія потым абсыпаюць сухой манкай або мукой, пасля чаго прасейваецца. Занадта маленькія макулінкі, якія праходзяць праз сіта, зноў абсыпаюць манкай, і г.д.

Разнавіднасці

Кус-кус з мясам (пераважна баранінай і ягняцінай) распаўсюджаны удалечыні ад міжземнаморскага берага.

У прыбярэжных абласцях Магрыба і на востраве Джэрба гатуюць кус-кус з рыбай і морапрадуктамі.

Нярэдка робяць вегетарыянскі кус-кус з гароднінай.

Салодкі кус-кус з вінаградам, сухафруктамі, арэхамі называецца масфуф.