Магрыб

Дзяржавы Магрыба

Ма́грыб (араб. المغرب ал-Магрыба «захад») — назва, дадзеная сярэднявечнымі арабскімі географамі і гісторыкамі краінам, размешчаным на захад ад Егіпта; захавалася ў арабскай мове і дагэтуль.

Да гэтага часу на арабскай мове так называецца Марока.

З захаду на ўсход: Маўрытанія, Заходняя Сахара, Марока, Алжыр, Туніс, Лівія. У сярэднія стагоддзі ў паняцце Магрыба ўключаліся таксама мусульманская Іспанія (Андалусія) і іншыя валодання былога Арабскага халіфата ў заходняй частцы Міжземнага мора (Балеарскія астравы, Сардзінія, Сіцылія).

Агульную назву Аль-Магрыб гэтыя дзяржавы атрымалі ў перыяд заваявальных паходаў арабаў. У перакладзе з арабскага Аль-Магрыб — «краіна, дзе заходзіць сонца» ці «Захад».

Гісторыя

На працягу шматлікіх стагоддзяў народы краін Магрыба вялі барацьбу з заваёўнікамі, адстойвалі свае палітычныя і эканамічныя інтарэсы. Берберы, рымская акупацыя, раманізацыя, вандалы, Візантыя, арабы, туркі, французскае каланіяльнае валадарства — усё гэта старонкі працяглай і складанай гісторыі гэтага краю. Здабыццё незалежнасці краінамі Магрыба адкрыла новы этап у развіцці гэтых дзяржаў.

У лютым 1989 г. кіраўнікі Алжыра, Марока, Туніса, Лівіі і Маўрытаніі падпісалі дагавор пра стварэнне Саюза Арабскага Магрыба (САМ) — новай рэгіянальнай палітыка-адміністрацыйнай арганізацыі.

Сімвалы

Эмблема Саюза арабскага Магрыба — сімвал хаўрусніцтва краін Магрыба. На эмблеме намаляваны абрысы краін удзельніц Саюза арабскага Магрыба — Алжыра, Лівіі, Маўрытаніі, Марока і Туніса, а таксама стылізаваныя выявы коласа пшаніцы і трыснёга.

Гл. таксама

• Блізкі Усход
• Сярэдні Усход
• Далёкі Усход
• Індакітай
• Машрык
• Кус-кус

Спасылкі

• Афіцыйны сайт Саюза арабскага Магрыба
• Канвертар валют Архівавана 10 сакавіка 2010.