Грэйт-Фолс — горад і адміністрацыйны цэнтр акругі Каскейд, штат Мантана, ЗША. Насельніцтва складае 56 690 чал. паводле даных перапісу 2000 года. Назва Грэйт-Фолс паходзіць ад аднайменнай назвы вадаспадаў, праз якія давялося перабірацца членам экспедыцыі Льюіса і Кларка падчас разведкі абласцей Луізіянскай куплі ў 1805—1806 гг. У горадзе размешчаны Музейны комплекс Ч. М. Расела, Універсітэт Грэйт-Фолс, а таксама бейсбольная каманда другой лігі «Грэйт-Фолс Вояджэрз». Грэйт-Фолс вядомы як «Электрычны горад», дзякуючы пяці гідраэлектрычным станцыям, размешчаным уздоўж ракі Місуры.