Кацярына Мікалаеўна Жаркова

Кацярына Жаркова
Дата нараджэння	30 кастрычніка 1981(1981-10-30) (42 гады)
Месца нараджэння	Мінск, БССР, СССР
Рост	178 см
Грудзі	105 см
Стан	84 см
Сцёгны	115 см
Колер валасоў	блонд[d]
Вочы	кары
Агенцтва	Wilhelmina Models[d]
zharkova.com (англ.)

Каця Жаркова, поўнае імя Кацярына Мікалаеўна Жаркова (нар. 30 кастрычніка 1981, Мінск, Беларуская ССР, СССР) — тэлепрадзюсар і фотамадэль родам з Беларусі.

Біяграфія

Нарадзілася ў сям’і афіцэра Мікалая Жаркова і прафесійнага фатографа Надзеі Жарковай. У верасні 1982 года бацькі з сямімесячнай дачкой пераехалі ў Чукоцкую аўтаномную акругу (РСФСР). Пазней сям’я пераязджала ў Маскву, Смаленск, ГДР. У верасні 1991 — маі 1994 года вучылася ў школе ў ГДР, дзе скончыла 4—7 класы, затым вярнулася з бацькамі ў Смаленск (Расія), дзе з 14 гадоў пачала займацца ў мадэльным агенцтве «Подыум» як поўная манекеншчыца. У верасні 1999 года паступіла ў Маскоўскі дзяржаўны ўніверсітэт культуры і мастацтваў (Хімкі, Маскоўская вобласць), які скончыла ў чэрвені 2003 года.

У лістападзе 2006 года стала першай поўнай фотамадэллю, якая трапіла на старонкі расійскага выдання амерыканскага часопіса «Касмаполітан». Затым сыграла шэраг эпізадычных роляў у расійскіх серыялах, пасля ўладкавалася асістэнткай прадзюсара на маскоўскім тэлеканале «Муз-ТБ», пазней стала тэлепрадзюсаркай. Сярод супрацоўнікаў тэлебачання сустрэла свайго мужа. 15 снежня 2009 года выйграла расійскі конкурс поўных мадэляў «Салодкая жанчына». На пачатку 2010 года стала вядоўцай 2-гадзіннай ранішняй перадачы на расійскім тэлеканале «ТНТ». У 2-й палове 2010 года выехала па «зялёнай картцы» ў ЗША, дзе знялася ў рэкламе жаночага адзення для гандлёвых сетак «Мода для фігуры» (Нью-Ёрк), «Назаўсёды 21» (Лос-Анджэлес, штат Каліфорнія) і «Сярэбраныя джынсы» (Вініпег, правінцыя Манітоба, Канада). У 2011 годзе прыняла ўдзел у фотасесіі ў Нью-Ёрку з фатографам Вікторыяй Джанашвілі. У студзені 2012 года нью-ёрскі часопіс «Поўная мадэль» суправадзіў рэдактарскі артыкул «Поўныя целы, што ж з імі не так» здымкамі Жарковай з сумеснай фотасесіі з хударлявай фотамадэллю. На здымках Кацярына Жаркова выглядала здаравейшай за хударлявую калегу. Кожны здымак суправаджаўся надпісамі датычна анарэксіі, у тым ліку: «Большасць мадэляў-пачаткоўцаў маюць індэкс масы цела, характэрны для анарэксіі». Пазней стала фотамадэллю нью-ёрскага агенцтва «Вільгельміна».

Спасылкі

• Katya Zharkova Archives (англ.)  (нявызн.) ?. PLUS Model Magazine. Праверана 12 красавіка 2024.
• Катя Жаркова - первая модель plus size, родом из Мачулищ | Мачулищи - Machulishi.of.by (нявызн.). web.archive.org (29 студзеня 2020). Архівавана з першакрыніцы 29 студзеня 2020. Праверана 12 красавіка 2024.