Міжрэгіянальнае аб’яднанне беларусаў Расіі
Міжрэгіянальнае аб’яднанне беларусаў Расіі (МАБР) (руск.: Межрегиональное Объединение Белорусов России, МОБР) — агульнарасійскае аб’яднанне беларускай дыяспары. Знаходзіцца ў апазіцыі да створанай пры падтрымцы беларускіх улад Федэральнай нацыянальна-культурнай аўтаноміі «Беларусы Расіі».
Заснаванне[правіць | правіць зыходнік]
Упершыню размовы пра неабходнасць стварэння агульнарасійскай арганізацыі беларускае дыяспары ўзніклі падчас правядзення Першага З’езда Беларусаў Свету ўлетку 1993. На З’ездзе адбылося некалькі сустрэчаў кіраўнікоў супольнасцей Масквы, Новасібірска, Санкт-Пецярбурга і іншых з абмеркаваннем гэтага пытання пры падтрымцы Рады ЗБС «Бацькаўшчына». Улетку 1997 года ЗБС «Бацькаўшчына» праводзіла ў Беластоку чарговую навукова-культурную канферэнцыю «Культура Беларускага Замежжа». На гэты сход ад Расіі прыехалі кіраўнікі 5-і самых буйных суполак з Санкт-Пецярбурга, Іркуцка, Масквы, Новасібірска і Калінінграда. Адбылося абмеркаванне пытання правядзення Устаноучага З’езда паміж кіраўнікамі гэтых аб’яднанняў. Паміж старшынямі пецярбурскага і маскоўскага таварыстваў было дасягнутае пагадненне пра правядзенне ў пачатку 1999 года ў Маскве З’езда беларусаў Расіі. Станоўча паставіўся да гэтага пагаднення і пазней увайшоў у Аргкамітэт З’езда прадстаўнік Іркуцка Алег Рудакоў, а старшыня Новасібірскага таварыства ўстрымаўся і пазней перайшоў у ФНКА. Прадстаўнік Калінінграда Шаховіч паведаміў, што яго суполка ўваходзіць у аб’яднанне Беларусаў Балтыі і ўдзельнічаць у расійскіх справах не збіраецца. Аргкамітэт з’езда вырашыў правесці З’езд беларусаў РФ 27 сакавіка 1999 года.
Спачатку добрае стаўленне з боку расійскіх урадавых структур 11 студзеня 1999 змянілася на супрацьлеглае, бо дзейнасць Аргкамітэта З’езда Беларусаў супярэчыла «працэсу аб’яднання Беларусі і Расіі».
27 студзеня 1999 года на сход сабраліся прадстаўнікі суполак з Масквы, Санкт-Пецярбурга, Іркуцка, Майкопа, Краснаярска, Цюмені, Маскоўскай і Уладзімірскай абласцей, агулам больш за 76 дэлегатаў з правам голасу каля 50 гасцёў. На з’езд прыехала дэлегацыя Вярхоўнага Савета РБ, у тым ліку Станіслаў Шушкевіч і Сямён Домаш, дэлегацыя ЗБС «Бацькаўшчына» (Ганна Сурмач і Барыс Стук), прадстаўнікі іншых дыяспар Масквы, барды Зміцер Бартосік і Віктар Шалкевіч, прадстаўнікі СМІ з Беларусі (У. Панада і іншыя), беларускай рэдакцыі Радыё Свабода і іншыя. У Прэзідыум З’езда ўвайшлі Ганна Сурмач, Станіслаў Шушкевіч, Генадзь Лех і Анатоль Грыцкевіч.
Рада МАБР[правіць | правіць зыходнік]
- Старшыня — Генадзь Лех (Масква)
- Намеснік старшыні — Анатоль Грыцкевіч (Санкт-Пецярбург)
- Намеснік старшыні — Алег Рудакоў (Іркуцк)
- Сакратар — Таіса Мішчанка (Масква)
- Член Рады — Анатоль Селівончык (Цюмень)
- Галоўны рэвізор — Яўген Чапко