Чудзінскі бой

Чудзінскі бой
Асноўны канфлікт: Усходнееўрапейскі тэатр ваенных дзеянняў Другой сусветнай вайны
Дата	11 кастрычніка 1942
Месца	вёска Чудзін
Праціўнікі
партызанскі атрад В. А. Васільева нямецкі гарнізон вёскі Чудзін
Камандуючыя
Васіль Аляксеевіч Васільеў

Чудзінскі бой — бой паміж партызанскім атрадам В. А. Васільева і нямецкімі акупантамі ў вёсцы Чудзін Ганцавіцкага раёна 11 кастрычніка 1942 года.

Перадумовы

Нямецкі гарнізон у вёсцы Чудзін, які налічваў каля 40 гітлераўцаў, узброеных 4 кулямётамі, аўтматамі і вінтоўкамі, уяўляў значную небяспеку для партызанскага атрада, бо ў выпадку блакады Арлікоўскага леса закрываў партызанам свабодны выхад цераз раку Морач у лясы Ганцавіцкага раёна.

Бой

Камандаванне атрада (камандзір В. А. Васільеў, камісар І. В. Зібараў) распрацавалі план разгрому гарнізона. У ноч на 11 кастрычніка атрад сканцэнтраваўся за 2 кіламетры на поўнач ад вёскі Чудзін, два аддзяленні партызан зрабілі засады на дарогах у вёскі Гаўрыльчыцы Лунінецкага і Колкі Клецкага раёнаў, каб не даць праціўніку магчымасці выйсці з гарнізона. Два ўзводы акружылі вёску. На досвітку 11 кастрычніка ўдарнае аддзяленне партызан зняло вартавога, і партызаны ўварваліся ў гарнізон. У выніку 1,5 гадзіннага бою ўзвод аховы, які засеў у будынку гарнізона быў часткова знішчаны, частка нямецкіх салдат прарвалася на ўскраіну вёскі, адкуль уцякла і схавалася ў балотах.

У ходзе вулічнага бою, які цягнуўся 2 гадзіны, партызаны знішчылі 6 і ўзялі ў палон 2 гітлераўцаў, захапілі 6 радыёпрыёмнікаў, 4 веласіпеды, 8 вінтовак, запас патронаў.

Нямецкі гарнізон у вёсцы Чудзін не быў адноўлены, што павялічыла партызанскую зону.

Літаратура

• М. Ф. Шумейка // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — 680 с. — 20 000 экз. — ISBN 5-85700-012-2.