Алеся (праходчы комплекс)

Алеся шчытавы праходчы комплекс, які з лютага 2016 года выкарыстоўваецца на будаўніцтве Мінскага метрапалітэну. Маса танэлепраходчага шчыта — 550 тон, даўжыня — 94 метры.

Гісторыя

Шчыт быў набыты ў Францыі ў снежні 2015 года за 11 мільёнаў долараў і з лютага 2016 года выкарыстоўваецца на будаўніцтве метрапалітэну. Ён можа праходзіць за месяц да 300 метраў, ствараючы тунэль і адразу мацуючы яго сценкі, але з-за тэхнічных асаблівасцяў грунтоў і іншых складанасцяў падчас праходкі часам хуткасць падае ў 2-3 разы.

Штат абслугоўвання «Алесі» — 15 чалавек.

Праца

Аўтаматызаваны механізаваны шчыт перасоўваецца па тунэлі, які сам жа і стварае. Наперадзе — ротар з разцамі. Ён круціцца, да яго пад ціскам падаюць адмысловую вадкасць, якая разрэджвае грунт. Зрэзаная парода паступае на стужачны транспарцёр, а потым — у ваганеткі. Пакуль дызелевоз адвозіць яе на адгрузку, на адмысловых калясках падаюцца бетонныя цюбінгі для мантажу чарговага кольца. Спецыяльны механізм збірае кольца, залівае бетонам і ўшчыльняе.

Усім працэсам кіруе аператар, гледзячы ў маніторы. Ён сядзіць у спецыяльнай кабіне — яна знаходзіцца ўнутры «Алесі».