Агератум

Агератум
Ageratum conyzoides. Агульны выгляд расліны
Навуковая класіфікацыя
прамежныя рангі Дамен:  Эўкарыёты Царства:  Расліны Аддзел:  Кветкавыя Клас:  Двухдольныя Парадак:  Астракветныя Сямейства:  Астравыя Падсямейства:  Астравыя Трыба:  Eupatorieae Род:  Агератум
Міжнародная навуковая назва
Ageratum L. (1753)
Сінонімы
Coelestina Cass.
Тыпавы від
Ageratum conyzoides L.
Сістэматыка на Віківідах Выявы на Вікісховішчы ITIS   36480 NCBI   55597 EOL   59467 GRIN   g:300 IPNI   30004082-2

Агератум (Ageratum) — род раслін сямейства Астравыя (Asteraceae). Расліны пераважна сустракаюцца ва Усходняй Індыі, Паўночнай і Цэнтральнай Амерыцы. Лацінская назва паходзіць ад грэч. ageratos — які не старэе, бо расліна з’яўляецца даўгацветам. У Беларусі вырошчваецца як кветкава-дэкаратыўная расліна.

Батанічнае апісанне

Шматгадовая травяністая або паўхмызняковая расліна. Сцябло — раскідзістае, моцна галінастае, прамастойнае або прыўзнятае, апушанае, 10-50 см вышынёй.

Лісце трохвугольнае, рамбічнае або авальнае, па краі зубчастае, шурпатае; ніжнія і сярэднія лісцінкі — супратыўныя, чарэшчатыя, верхнія — чаргавальныя, амаль сядзячыя.

Кветкі дробныя, вузкатрубчатыя, абедзвеполыя, духмяныя, сабраны ў невялікія суквецці-кошыкі 1-1,5 см у дыяметры. Сабраны ў складаныя шчыткападобныя суквецці да 10 см у папярочніку. Дэкаратыўнасць суквеццям надаюць двухлопасцевыя рыльцы кветак, якія амаль удвая перавышаюць даўжыню калякветніка і моцна выдаюцца над ім.

Насенне пяціграннае з плёнчатым чубком, захоўваюць усходжасць 2-3 гады. У 1 г — да 6000 зярнят.

Квітнее вельмі буйна з чэрвеня да першых замаразкаў. Пладаносіць у пачатку верасня.

У нізкарослых сартоў кветканосы, як правіла, утвараюць некалькі ярусаў, а ў сярэдневысокіх усе яны размешчаны на адным узроўні, таму расліны, высаджаныя групай, утвараюць суцэльны кветкавы дыван.

Агератум засухаўстойлівы і святлалюбівы.