Жаўтагорлая мыш (Apodemus flavicollis) — млекакормячая жывёла сямейства мышападобных.
Даўжыня цела і хваста па 10—13 см. Поўсць ад вохрыста-рыжаватай да цёмна-бурай.
Водзіцца ў старых шыракалістых і мяшаных лясах, хмызняках, на палях каля лесу; пашырана на Беларусі (найбольш на поўдні). Жыве ў норах, дуплах. Добра лазіць па дрэвах. Корміцца жалудамі, ляснымі арэхамі, насеннем раслін, карой маладых дрэў, на зіму назапашвае часам да 300 і болей жалудоў. Размнажаецца ў красавіку—верасні, дае 2—3 прыплоды па 4—8 дзіцянят.
Шкодзіць лясной гаспадарцы: падгрызае дрэўцы ў гадавальніках. Часам перасяляецца на пасевы збожжавых і прычыняе шкоду сельскай гаспадарцы . Пераносіць узбуджальнікаў небяспечных хвароб.
