ПАЗ-3205

З Вікіпедыі, свабоднай энцыклапедыі
ПАЗ-3205
ПАЗ-3205 узору 1989—2014 гадоў
ПАЗ-3205 узору 1989—2014 гадоў
Вытворца Паўлаўскі аўтобус
Гады выпуску 1989—ц.ч.
Храналогія
◄ПАЗ-672
Фотагалерэя на Wikimedia Commons ПАЗ-3205 на Вікісховішчы

ПАЗ-3205 — савецкі і расійскі высокападлогавы аўтобус малога класа. Выпускаецца Паўлаўскім аўтобусным заводам з 1989 года.

Гэта самы распаўсюджаны аўтобус у Расіі: станам на 1.01.2023 года зарэгістравана 100 525 асобнікаў гэтай мадэлі[1]. Выкарыстоўваецца для перавозкі дзяцей, вахтавых рабочых, як маршрутныя таксі або асноўны транспарт у невялікіх гарадах[2].

Гісторыя[правіць | правіць зыходнік]

Распрацоўваўся на працягу амаль 15 гадоў. Асновай паслужыў распрацаваны цягам 1972-1977 гады, але так і не запушчаны ў вытворчасць ПАЗ-3203. Першы прататып новага аўтобуса ПАЗ-3205 быў выраблены ў 1979 годзе. Выпрабаванні скончыліся ў 1982 годзе. У 1984 годзе ПАЗ-3205 сталі вырабляцца ў невялікай колькасці і на працягу наступных пяці гадоў гэтыя аўтобусы збіралі ўручную ў цэху малых серый. Выпуск на галоўным канвееры пачаўся ў студзені 1989 года, а 1 снежня 1989 года ПАЗ-3205 канчаткова замясціў папярэднюю мадэль ПАЗ-672М[3].

Статыстыка выпуску ПАЗ-3205 у 1989—2000 гады[3]
1989 1990 1991 1992 1993 1994 1995 1996 1997 1998 1999 2000
307 8 004 9 680 10 342 11 070 9 073 7 800 7 235 8 679 8 500 7 495 8 060

4 чэрвеня 2001 года на заводзе выраблены 100-тысячны аўтобус гэтай мадэлі. У 2008 годзе праведзена мадэрнізацыя вытворчасці, што дазволіла праводзіць сертыфікацыю для рэгулярнага выкарыстання на загружаных маршрутах, значна ўзрос рэсурс службы кузава (з 5 да 10 гадоў), у салон усталёўваюцца больш эфектыўны ацяпліцель і больш камфортныя сядзенні.

Статыстыка выпуску ПАЗ-3205 у 2001—2013 гады[3]
2001 2002 2003 2004 2005 2006 2007 2008 2009 2010 2011 2012 2013
10 126 10 131 10 249 10 520 11 546 11 680 11 728 11 661 5 733 6 380 6 726 7 089 6 151

Пасля рэстайлінгу[правіць | правіць зыходнік]

ПАЗ-3205 узору 2014—2023 гадоў

У 2014 годзе з’явіліся аўтобусы з новай маскай з лінзавай пярэдняй оптыкай Hella і дзённымі хадавымі агнямі. Некаторы час такое афармленне прапаноўвалася як опцыя. У ліпені 2015 года вытворчасць аўтобусаў сямейства ПАЗ-3205 са старым варыянтам экстэр’ера была спынена і ў продажы засталіся толькі рэстайлінгавыя машыны[4][5].

У лютым 2023 года пачаліся продажы аўтобусаў з новай маскай. У новай версіі на ПАЗ-3205 вярнуліся дзве сяміцалёвыя фары савецкага ўзору. За выключэннем фар, астатняе афармленне пярэдняй і задняй частак засталося ранейшым[6].

Канструкцыя[правіць | правіць зыходнік]

Кузаў[правіць | правіць зыходнік]

Выгляд ззаду. Мадыфікацыя з аварыйнымі заднімі дзвярмі

Кузаў — вагоннай кампаноўкі. Можа мець альбо дзве двухстворкавыя ўваходныя пасажырскія дзверы з пнеўматычным прывадам, альбо толькі адны пасажырскія дзверы з дадатковымі заднімі дзвярмі на завесах, якія лічацца аварыйным выхадам.

Рухавікі[правіць | правіць зыходнік]

З 1992 года базавым рухавіком стаў ЗМЗ-5112.10 (4,25 л, 125 к.с.), а з 1995 года на канвеер сталі паступаць яшчэ больш магутныя рухавікі ЗМЗ-5234.10 (4,67 л, 130 к.с.)[7]. З 1995 года спачатку паштучна, а з 1997 года серыйна сталі выпускацца аўтобусы з дызельнымі рухавікамі Мінскага маторнага завода[8].

У цяперашні час аўтобусы абсталёўваюцца рухавіком ЗМЗ V8 (4,7 л) у бензінавай і біпаліўнай (бензін + прапан-бутан) версіях, або турбадызелем ЯМЗ-534 (4,4 л)[6].

Бензінавы ЗМЗ-523 і біпаліўны ЗМЗ-524 з’яўляюцца мадэрнізаванымі версіямі рухавіка ЗМЗ-53. Рухавік мае аб’ём 4,67 л, дыяметр цыліндру — 92 мм і ход поршня — 88 мм, блок цыліндраў адліты з лёгкіх сплаваў на аснове алюмінію, але гільзы ў яго чыгунныя. У бензінавай версіі матор развівае 124 к.с. магутнасці і 298 Н·м круцільнага моманту, у біпаліўнай — 138 к.с. і 314 Н·м. Сістэма ўпырску інжэктарная, з электронным блокам кіравання. Канструкцыя ніжневальная, верхняклапанная.

У канцы 2021 года матор ЗМЗ знялі з вытворчасці з-за нізкага попыту, аднак у студзені 2023 года выпуск аднавілі, калі на фоне санкцый зноў узнікла патрэбнасць у гэтым маторы[9].

Шасі[правіць | правіць зыходнік]

ПАЗ-3205 могуць абсталёўвацца мастамі або Разанскага завода аўтаагрэгатаў (РЗАА), або Канашскага аўтаагрэгатнага завода (КААЗ).

На падоўжаным аўтобусе ПАЗ-4234 усталяваны шэраг кампанентаў ад грузавікоў ЗІЛ: кошык шчаплення, каробка перадач, карданны вал. Задні мост — ад ЗІЛ-4331 (вытворца — РЗАА). Аўтобусы з такімі мастамі можна пазнаць па колах на васьмі шпільках.

Падвеска — залежная, рысорная. Рулявое кіраванне — з гідраўзмацняльнікам. Тармазы — барабанныя. Да 2003 года аўтобусы камплектавалі тармазной сістэмай, якая складаецца з двух контураў: гідраўлічнага і пнеўматычнага, як на грузавіках ГАЗ. З 2003 года тармазную сістэму мадэрнізавалі: яна стала цалкам пнеўматычнай, была ўсталявана ABS фірмы «Knorr-Bremse».

Мадыфікацыі[правіць | правіць зыходнік]

  • ПАЗ-3205 — базавы варыянт з аднымі аўтаматычнымі дзвярыма і пнеўмагідраўлічнай тармазной сістэмай.
  • ПАЗ-32051 — аўтобус з двума аўтаматычнымі дзвярыма. З’явіўся ў 1993 годзе[10].
  • ПАЗ-32053 — аўтобус з аднымі аўтаматычнымі дзвярыма для прыгарадных маршрутаў і пнеўматычнай тармазной сістэмай з АБС.
  • ПАЗ-32054 — аўтобус з двума аўтаматычнымі дзвярыма для гарадскіх маршрутаў і пнеўматычнай тармазной сістэмай з АБС.

ПАЗ-3206[правіць | правіць зыходнік]

ПАЗ-3206

ПАЗ-3206 — паўнапрывадны аўтобус. Выпускаецца з 1994 года.

Пярэдні вядучы мост узяты ад ГАЗ-66-40: з канічнай гіпоіднай галоўнай перадачай (перадатачны лік 6,17) і кулачковым дыферэнцыялам падвышанага трэння. Раздатачная каробка: 2-ступеньчатая (паніжальная перадача з лікам 1,982), без міжвосевага дыферэнцыяла. Дарожны прасвет такі ж як у заднепрывадных ПАЗ-32053 (264 мм), аднак у параўнанні з заднепрываднай версіяй кузаў ПАЗ-3206 пасаджаны над дарогай на 10 см вышэй. У выніку палепшылася геаметрычная праходнасць, але недахопам з’яўляецца высокі цэнтр цяжару. З гэтай прычыны не дазваляецца перавозка стаячых пасажыраў. Для паляпшэння папярочнай устойлівасці і ў пярэдняй, і ў задняй падвесках усталяваныя стабілізатары. У адрозненне ад ПАЗ-32053, якія былі пераведзены на пнеўматычны прывад тармазоў, на ПАЗ-3206 застаўся прывад старога тыпу — пнеўма-гідраўлічны[11].

ПАЗ-4234[правіць | правіць зыходнік]

ПАЗ-4234

ПАЗ-4234 — аўтобус сярэдняга класа. З’яўляецца падоўжанай версіяй аўтобуса ПАЗ-32054 з двума ўваходнымі дзвярыма. Кузаў стаў даўжэй на 1165 мм, з якіх 745 мм прыйшлося на колавую базу і 420 мм на заднюю навісь. Пасажыраўмяшчальнасць павялічылася да 50 месцаў, з якіх 30 месцаў сядзячыя. У салоне дзве назапашвальныя пляцоўкі.

Выпускаецца з 2003 года[12]. Разам з базавай мадэллю паўсталі і мадыфікацыі: аўтобус з сядзеннямі павышанай камфартабельнасці (ПАЗ-423402), аўтобусы з аднымі аўтаматычнымі дзвярыма (стандартны ПАЗ-423401 і люксавы ПАЗ-423403), а таксама з узмоцненай тэрмаізаляцыяй кузава. Мадыфікацыі з рухавікамі Cummins маюць дадатак «-05», з рухавіком ЯМЗ — «-04»[13].

Статыстыка выпуску ПАЗ-4234 у 2003—2013 гады[3]
2003 2004 2005 2006 2007 2008 2009 2010 2011 2012 2013
709 1 232 1 792 2 111 2 534 1 869 1 104 1 382 1 823 1 722 1 282

Тэхнічныя характарыстыкі[правіць | правіць зыходнік]

Тэхнічныя характарыстыкі[14]
ПАЗ-32053 ПАЗ-32053-07 ПАЗ-4234
Габарытныя памеры, мм 6925 × 2480 × 2960 8165 × 2500 × 2960
Колавая база, мм 3600 4345
Радыус паварота, м 7,6 8,7
Колькасць дзвярэй 1 + 1 2
Пасажыраўмяшчальнасць, чал. 41 50
Колькасць месцаў 25 + 1 30 + 1
Дапушчальная поўная маса, кг 8155 9485
Аб’ём паліўнага бака, л 105
Рухавік Мадэль ЗМЗ-5234.10 ММЗ Д-245.7 ММЗ Д-245.9
Тып бензінавы, V8 турбадызельны, чатырохцыліндравы
Аб’ём, л 4,67 4,75
Магутнасць 130 к.с. пры 3200 аб/хв 122 к.с. пры 2400 аб/хв 136 к.с. пры 2400 аб/хв
Круцільны момант 314 Н·м пры 3200 аб/хв 424 Н·м пры 2400 аб/хв 460 Н·м пры 2400 аб/хв
Каробка перадач Механічная, пяціступеньчатая
Макс. хуткасць, км/г 90 95 90
Расход паліва, л 18 15 17,1

Зноскі

  1. ↑ Автобусный парк в России насчитывает более 341 тыс. машин (руск.). avtostat-info.com (20 лютага 2023). Праверана 28 сакавіка 2023.
  2. ↑ Авто-юбилей // Рейс : часопіс. — 2010. — № 1. — С. 30. (руск.)
  3. ↑ а б в г ГрузовикПресс №2 2015.
  4. ↑ Смена лица // Коммерческий транспорт : часопіс. — 2015. — № 5 (121). — С. 58. (руск.)
  5. ↑ "Автобусы ПАЗ получили новый экстерьер". autostat.ru [руская]. 2015-07-13. Праверана 2023-03-28.
  6. ↑ а б "К дилерам поступил рестайлинговый «пазик»". Drom.ru [руская]. 2023-02-02. Праверана 2023-03-28.
  7. ↑ Коммерческий транспорт №2 (102) 2013, с. 71.
  8. ↑ Коммерческий транспорт №2 (102) 2013, с. 73.
  9. ↑ "«Группа ГАЗ» разработала новые модели газовых автобусов ПАЗ". Drom.ru [руская]. 2014-07-15. Праверана 2023-03-28.
  10. ↑ Коммерческий транспорт №2 (102) 2013, с. 72.
  11. ↑ Коммерческий транспорт №6 (66) 2008, с. 107–114.
  12. ↑ Пресс-службы сообщают // За рулём : часопіс. — 2003. — № 4. — С. 88. (руск.)
  13. ↑ КТ-хронограф. 10 лет: ПАЗ-4234 // Коммерческий транспорт : часопіс. — 2012. — № 8 (100). — С. 92. (руск.)
  14. ↑ ГрузовикПресс №7 2006.

Літаратура[правіць | правіць зыходнік]

  • Между городом и деревней // За рулём : часопіс. — 2003. — № 6. — С. 82. (руск.)
  • Народный автобус ПАЗ // ГрузовикПресс : часопіс. — 2006. — № 7. (руск.)
  • Тест ПАЗ-3206-70 // Коммерческий транспорт : часопіс. — 2008. — № 6 (66). (руск.)
  • Автобусы с берегов Оки. II. // Коммерческий транспорт : часопіс. — 2013. — № 2 (102). — С. 68–73. (руск.)
  • Вне времени // ГрузовикПресс : часопіс. — 2015. — № 2. (руск.)

Спасылкі[правіць | правіць зыходнік]

Узята з "https://be.wikipedia.org/w/index.php?title=ПАЗ-3205&oldid=4575815"