Цела падоўжанае (да 5 мм). Ротавы апарат рэдукаваны. Крылаў 2 пары, пярэднія трохі даўжэй задніх. Брушка падоўжанае, складаецца з 10 сегментаў, на канцы нясе 3 членістых ніцепадобных вырасты, здольныя ўцягвацца. Характэрная асаблівасць лічынкі — зліццё пярэдне- і сярэднеспінкі разам з крылавымі зародкамі ў адзіны шчыт.
Арэал вывучаны недастаткова. Вельмі рэдкі еўрапейскі від, лічынкі якога сустракаюцца ў буйных рэках Заходняй і Сярэдняй Еўропы (Гарона, Рэйн, Сена, Мозель, Влтава, Заходняя Дзвіна), а таксама ў Швецыі. Лічынкі гэтага віду адзначаны таксама ў р. Кура.
Лічынкі жывуць у буйных рэках, сярод даламітавых россыпаў на дне. Дарослыя асобіны трымаюцца паблізу вадаёмаў.
Характэрна наяўнасць дзвюх крылатых стадый — субімага (жывуць ад некалькіх секунд да некалькіх гадзін) і імага (ад некалькіх гадзін да некалькіх сутак). Крылатыя стадыі не харчуюцца. Пладавітасць — да некалькіх тысяч яец, якія адкладваюцца ў ваду. Развіццё з няпоўным ператварэннем. Лічынкі днём хаваюцца ў расколінах і пад камянямі, актыўныя толькі ўначы, жывуць 1-3 гады і праходзяць 25 лінек, сілкуюцца дэтрытам і дробнымі водарасцямі.
