Даўжыня цела 23-27 см, размах крылаў 46-55 см. У шлюбным уборы спод цела ржавага колеру, верх жоўта-карычневы з выразнымi цёмнымi рыскамi. У негнездавы час шаравата-карычняваты, ад споду белы. Верх цела з характэрным лускаватым рысункам. Дзюба кароткая i прамая. У палёце зверху светлая паяснiца i хвост з мноствам цёмных плямак, па краі крыла больш светлая паласа.
Арэал разарваны. Ізалявана жыве невялікімі «астраўкамі» ў крайніх раёнах Паўночнай Галарктыкі, у Азіі і Амерыцы. Магчыма, гняздзіцца і на Шпіцбергене.
Насяляе арктычную пагоркавую або горную тундру далёка ад марскіх берагоў, аддае перавагу паўастравам і астравам, якія выступаюць на поўнач за край мацерыка; на Грэнландыі — скалістыя паліцы са скальным друзам, вулканічнай лавай або кучамі лёду з ледавiкоў. Пад час пералётаў і на зімоўцы — марскія ўзбярэжжы (пясчаныя, глеевыя або камяністыя).
Пералётны від. Рэгулярна пралятае праз Еўропу. Месца зімовак: Заходняя Еўропа, Брытанскія а-вы, Ірландыя, Інданезія, Малайзiя, Індакітай, Аўстралія, Новая Зеландыя, Паўночная, Заходняя і Паўднёвая Афрыка, паўднёвыя ўзбярэжжы Паўночнай (Фларыда), Цэнтральнай і Паўднёвай Амерыкi (галоўным чынам Аргенціна).
Гняздо ладзіць на сухім адкрытым пагорку, звычайна паблізу вады, часам у купіне раслін. Гэта амаль плоская ямка з высцілкай з кавалкаў раслін і лішайнікаў.
Яйкі (3-4) ад авальных да грушападобных, светла-гліністыя, жаўтавата-зеленаватыя або аліўкава-зеленаватыя, глыбокія плямы — невялікія, светла-фіялетавыя, паверхневыя — чорна-карычневыя, на тупым канцы могуць злівацца.
