Рычард Бёрбедж

Рычард Бёрбедж
англ.: Richard Burbage
Дата нараджэння	6 студзеня 1567 ці 7 студзеня 1567
Месца нараджэння	Лондан, Каралеўства Англія
Дата смерці	13 сакавіка 1619(1619-03-13) (52 гады)
Месца смерці	Лондан, Каралеўства Англія
Грамадзянства	Каралеўства Англія
Прафесія	тэатральны акцёр
Медыяфайлы на Вікісховішчы

Рычард Бёрбедж (англ.: Richard Burbage; 6 студзеня 1567 — 13 сакавіка 1619) — англійскі акцёр эпохі Адраджэння, сябар і паплечнік Шэкспіра. Першы выканавец такіх роляў як: Гамлет, Рычард III, Лір, Генрых V, Атэла, Рамэа, Макбет і інш.

Біяграфія

Рычард Бёрбедж нарадзіўся ў 1567 годзе ў Лондане ў тэатральнай сям’і. Яго бацька Джэймс Бёрбедж у маладосці быў цесляром, пазней стаў акцёрам, пазней кіраваў трупай «слугі графа Лестэра». Ён пабудаваў першы тэатральны будынак у Лондане, арганізоўваў і кіраваў акцёрскімі трупамі. Сыны Джэймса пайшлі па слядах бацькі: Катберт займаўся антрэпрэнёрскай працай, а Рычард абраў акцёрскую прафесію. Урокі акцёрскага майстэрства ён браў у Эдуарда Алена, вядомага сваімі ролямі ў трагедыях Марла. Пра маладосць Бёрбеджа вядома вельмі мала. Верагодна, ён граў у 1590—1593 гадах у трупах «слугі лорда-адмірала», «слугі лорда Стрэнджа», «слугі графа Пембрака». Аднак праславіўся як зорка трупы лорда-камергера і выканаўца галоўных роляў у п’есах Шэкспіра. Разам з братам валодаў паловай тэатра «Глобус».