Інгрыд Бекер

Інгрыд Бекер
ням.: Ingrid Mickler-Becker
Агульная інфармацыя
Пол	жанчына
Нарадзілася	26 верасня 1942(1942-09-26) (82 гады) Гезеке, раён Зост, адміністрацыйная акруга Арнсберг, правінцыя Вестфалія, Прусія
Грамадзянства	Германія
Рост	177 см
Вага	66 кг
Медыяфайлы на Вікісховішчы

Інгрыд Міклер-Бекер (ням.: Ingrid Mickler-Becker; нар. 26 верасня 1942 г., Гезеке, Арнсберг) — нямецкая лёгкаатлетка, двухразовая алімпійская чэмпіёнка, двухразовая чэмпіёнка Еўропы 1971 года.

Біяграфія

Інгрыд Бекер нарадзілася ў 1942 годзе ў Гезеку. Яе бацька загінуў на Другой сусветнай вайне. Інгрыд выступала ў лёгкай атлетыцы за клубы LG Geseke і USC Mainz. У 1959 годзе яна перамагла на юнацкім чэмпіянаце Германіі ў бегу на 100 м.

Бекер удзельнічала ў летніх Алімпійскіх гульнях 1960 года ў Рыме, але не заняла прызавых месцаў. Яна была самым юным членам зборнай ФРГ. На летніх Алімпійскіх гульнях 1964 года яна заняла чацвёртае месца ў скачку ў даўжыню і восьмае ў пяцібор’і.

На летніх Алімпійскіх гульнях 1968 года ў Мехіка Бекер перамагла ў пяцібор’і. На Чэмпіянаце Еўропы па лёгкай атлетыцы 1971 года ў Хельсінкі яна перамагла ў скачку ў даўжыню і ў эстафеце 4х100 метраў у складзе зборнай ФРГ. Яна таксама заняла другое месца ў бегу на 100 м, уступіўшы прадстаўніцы ГДР Рэнатэ Штэхер.

На летніх Алімпійскіх гульнях 1972 года ў Мюнхене Бекер перамагла ў эстафеце 4×100 метраў у складзе зборнай ФРГ. Пры гэтым немкі ўстанавілі новы сусветны рэкорд 42,81 с.

У 1968 і 1971 гадах Бекер была ўдастоена тытула Спартсменкі года Германіі. У 1968 годзе яна была ўзнагароджана Сярэбраным лаўровым лістом. У 2006 годзе Міклер-Бекер была ўключана ў Залу славы нямецкага спорту.

З 1977 года Бекер была членам Нацыянальнага алімпійскага камітэта Германіі. Яна скончыла педагагічную адукацыю, працавала настаўнікам у Майнцы. Бекер выйшла замуж за Фрыдэля Міклера, у шлюбе нарадзіўся сын Філіп. Сям’я некаторы час жыла ў ЗША, дзе Інгрыд вучылася ў Мічыганскім універсітэце. З 1990 года Міклер-Бекер была статс-сакратаром у Міністэрстве сацыяльных спраў зямлі Рэйнланд-Пфальц ад ХДС на працягу паўтара года.