Выбух на Светлагорскім цэлюлозна-кардонным камбінаце
| Выбух на ААТ „Светлагорскі цэлюлозна-кардонны камбінат“ | |
|---|---|
| Тып | выбух |
| Месца | Светлагорск, Гомельская вобласць |
| Краіна | Беларусь |
| Дата | 7 чэрвеня 2023 |
| Час | паміж 15:30 і 15:40 (UTC+3) |
| Пацярпелых | 4 чалавекі |
  Светлагорскі ЦКК |
|
Выбух на ААТ «Светлагорскі цэлюлозна-кардонны камбінат» — надзвычайнае здарэнне, што адбылося 7 чэрвеня 2023 года ў горадзе Светлагорск (Гомельская вобласць, Беларусь).
Храналогія[правіць | правіць зыходнік]
7 чэрвеня прыкладна а 15.30 ратавальнікі атрымалі паведамленні пра ўспышку газапаветранай сумесі без наступнага гарэння на тэрыторыі Светлагорскага цэлюлозна-кардоннага камбінату і выехалі на месца здарэння, паведамілі ў МНС Беларусі[1].
Выбух адбыўся на ўчастку выпаркі шкіпінару цэха рэгенерацыі. У выніку былі пашкоджаны металічныя абшыўкі трох рэзервуараў і парушана цэласнасць аднаго з рэзервуараў, пашкоджаны будаўнічыя канструкцыі ўчастка і бліжэйшых будынкаў[2].
«Выбух быў чутны ў суседняй з заводам вёсцы Якімава Слабада. Людзі папужаліся вельмі», — расказала сведка выбуху[3].
Ахвяры[правіць | правіць зыходнік]
Міністэрства аховы здароўя паведаміла а 18.30, што вядома пра 4 пацярпелых (1985—1996 г.н.). Ва ўсіх дыягнаставаны паверхневыя раны галавы і паверхневыя апёкі рук. Медыцынская дапамога аказана брыгадамі хуткай дапамогі на месцы. Ад шпіталізацыі пацярпелыя адмовіліся.
Праз некалькі гадзін МНС заявіла, што ў выніку пошукава-выратавальных работ на месцы аварыі знойдзеныя парэшткі меркавана траіх чалавек[4]. Разбор завалаў і пошукавыя работы працягваліся яшчэ некалькі дзён.
Спіс загінулых[правіць | правіць зыходнік]
- Алег Кацуба
- Віктар Раманькоў
- Міхаіл Шаціца
Зноскі
- ↑ На Светлогорском ЦКК произошло ЧП, Светлагорскія навіны, 7-06-2023
- ↑ Заява кіраўніцтва Светлагорскага ЦКК, афіцыйны сайт ЦКК
- ↑ «Выбух быў, як бомба ўпала». На Сьветлагорскім цэлюлёзна-кардонным камбінаце ў выніку выбуху загінулі 3 чалавекі, 4 параненыя, Радыё Свабода, 7-06-2023 (бел. (тар.))
- ↑ Мінімум тры чалавекі загінулі пры выбуху на цэлюлозна-кардонным камбінаце ў Светлагорску, bar24.by, 7-06-2023
