Партызанская брыгада «Уперад»

Партызанская брыгада «Уперад»
Гады існавання	1943-1944
Краіна	СССР Беларуская ССР
Падпарадкаванне	Беларускі штаб партызанскага руху
Уваходзіць у	Лідскае партызанскае злучэнне
Тып	партызаны
Функцыя	змаганне з акупантамі
Колькасць	471 партызан (6 ліпеня 1944)
Дыслакацыя	Юрацішкаўскі і Іўеўскі раёны
Войны	Другая сусветная вайна Вялікая Айчынная вайна
Камандзіры
Вядомыя камандзіры	Б. А. Булат; Ф. Г. Камароў (выконваў абавязкі)

Партызанская брыгада «Уперад» — партызанская брыгада, створаная ў лістападзе 1943 года. Дзейнічала на акупіраванай тэрыторыі Юрацішкаўскага і Іўеўскага раёнаў. 6 ліпеня 1944 года брыгада (471 партызан, 4 атрады) злучылася з Чырвонай Арміяй. Камандзіру брыгады Барысу Адамавічу Булату было прысвоена званне Героя Савецкага Саюза.

Склад

Брыгада была створана на базе атрадаў:

• імя Чкалава (арганізаваны ў ліпені 1942 года на базе груп Ф. І. Зайцава, І. М. Палешчука, С. С. Ключніка, І. М. Ляўковіча);
• імя Аляксандра Неўскага;
• «Бальшавік» (арганізаваны ў чэрвені 1943);
• «Гай» (арганізаваны ў маі 1943);
• «Сібірак» (арганізаваны ў верасні 1943 года на базе добраахвотнікаў-сібіракоў).

У красавіку 1944 года на базе атрада імя Аляксандра Неўскага, вылучанага з брыгады была створана партызанская брыгада імя Аляксандра Неўскага.

На момант злучэння брыгады з Чырвонай Арміяй, у яе склад уваходзілі:

• атрад імя Чкалава;
• атрад «Беларускі мсцівец»;
• атрад «Бальшавік»;
• атрад «Сібірак».

Камандаванне

Камандзіры

• Б. А. Булат;
• Ф. Г. Камароў (выконваў абавязкі).

Камісар

• М. В. Пронькін.

Начальнік штаба

• М. У. Сабіла.

Гісторыя

Партызаны баявымі дзеяннямі зрывалі нямецкія перавозкі на чыгуначных участках Ліда — Маладзечна, Баранавічы — Ліда. У лютым 1944 года на ўчастку Яхімаўшчына — Юрацішкі спалілі 58 вагонаў з ваеннай тэхнікай, спынілі рух на 57 гадзін. Разграмілі 10 нямецкіх апорных пунктаў, у сакавіку правялі 15 баёў, захапілі 15 вінтовак, 2 кулямёты, боепрыпасы. У чэрвені 1944 года падарвалі 580 рэек.

Памяць

У 1965 годзе ў Лідзе ў гонар брыгады была пастаўлена стэла, у 1969 у вёсцы Бакшты Іўеўскага раёна — абеліск.

Літаратура

• Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — 680 с. — 20 000 экз. — ISBN 5-85700-012-2.