Патвін

Патвін (Patwin)
Агульная колькасць	1000 (1910 г.)
Рэгіёны пражывання	ЗША
Мова	мовы патвін
Рэлігія	анімізм, хрысціянства
Блізкія этнічныя групы	іншыя вінтун

Патвін (саманазва: Patwin, літаральна "народ") — індзейскі народ у Каліфорніі (ЗША), паўднёвая галіна вінтун. Агульная колькасць (1910 г.) - 1000 чал.

Да сярэдзіны XIX ст. патвін насялялі даліну ракі Сакрамента. Археалагічныя раскопкі 1948 - 1955 гг. сведчаць пра тое, што продкі патвін жылі ў гэтай мясцовасці каля 1500 гадоў. Падзяляліся на паўночную і паўднёвую групы, кожная з якіх размаўляла на асобнай мове. Яны не мелі агульнай саманазвы. Сучасная саманазва патвін была ўведзена амерыканскім журналістам і этнографам Стывенам Паўэрсам.

Асноўнымі заняткамі з'яўляліся збіральніцтва, паляванне і рыбалоўства. Адзінай свойскай жывёлай быў сабака, мяса якога лічылася неядомым па рэлігійных прычынах.

Першыя кантакты з еўрапейцамі пачаліся ў 1808 г. Пасля далучэння Каліфорніі да ЗША былі пераселены ў некалькі рэзервацый, дзе актыўна змешваліся з іншымі вінтун. У 1910 г. Альфрэд Льюіс Кробер ацэньваў іх агульную колькасць у 1000 чалавек.

У нашы дні ў жывых застаўся толькі 1 чалавек, што размаўляе на паўночнай мове патвін. Паўднёвая мова патвін мёртвая. У Каліфорніі дзейнічае шэраг праектаў па адраджэнню паўночнай мовы.

Спасылкі

• Patwin — California Indians
• TRIBES OF CALIFORNIA
• Territory: Patwin Архівавана 12 ліпеня 2018.
• Quail Ridge Reserve — Human History Patwin Архівавана 16 лістапада 2008.