Індэпэндэнс I
| Індэпэндэнс I Каменны век | |
|---|---|
| Геаграфічны рэгіён | Арктыка |
| Лакалізацыя | Грэнландыя, Канадскі Арктычны архіпелаг |
| Датаванне | сярэдзіна 3 тысячагоддзя да н.э. — 2 тысячагоддзе да н.э. |
| Носьбіты | палеаэскімосы |
| Тып гаспадаркі | паляванне, рыбалоўства |
 |
|
Індэпэндэнс I (дацк.: Independence I) — археалагічная культура палеаэскімосаў на поўначы Грэнландыі і паўночнай часткі астравоў Канадскага Арктычнага архіпелага. Існавала ў сярэдзіне 3 — канцы 2 тысячагоддзяў да н. э. Адкрыта ў 1938 г. у раёне грэнландскага фіёрда Індэпэндэнс, хаця асобныя знаходкі рабіліся з пачатку XX ст.
Індэпэндэнс I — найбольш старажытная палеаэскімоская культура, носьбіты якой перасяліліся ў Грэнландыю. Аб іх паходжанні вядома мала. Мяркуецца, што яны маглі мець агульных продкаў з прадстаўнікамі культуры Сакак, аднак, у адрозненне ад апошніх, з’яўляліся сухапутнымі паляўнічымі. Палявалі пераважна на аўцабыкоў, таксама на белых мядзведзяў, пясцоў, птушак. Рэштак марскіх звяроў каля стаянак амаль не знойдзена. Некаторыя даследчыкі сумняваюцца нават у тым, ці трымалі носьбіты Індэпэндэнс I сабак, хаця вядомы адзінкавы выпадак знаходжання сабачых костак. Жылі ў круглявых, відавочна скураных хацінах з агменем пасярэдзіне. Паселішчы маглі ўключаць да 20 чалавек. Карысталіся крамянёвымі мікралітамі.
Знікненне культуры Індэпэндэнс I супадае з пахаладаннем клімату ў паўночным паўшар’і.