Брацкая магіла (Коўчыцы 2)

Славутасць
Брацкая магіла
Краіна	Беларусь
Вёска	Коўчыцы 2
Дата пабудовы	1943 год
Статус	Гісторыка-культурная каштоўнасць Беларусі, шыфр 313Д000760

Брацкая магіла — вайсковае пахаванне ў в. Коўчыцы 2, Светлагорскі раён.

Апісанне

На паўночна-заходняй ускраіне вёскі пахаваны 12 воінаў 37-й гвардзейскай стралковай дывізіі і партызан атрада імя А. Я. Пархоменкі, якія загінулі ў снежні 1943 года ў баях супраць нямецка-фашысцкіх захопнікаў.

У час баявых дзеянняў у лістападзе 1943 года войскі 65-й арміі (камандуючы генерал-лейтэнант П. І. Батаў) Беларускага фронту ўстанавілі цесную сувязь з партызанамі. 8 снежня ў штабе 37-й гвардзейскай дывізіі ў в. Мікалаеўка Парыцкага раёна адбылася нарада прадстаўнікоў партызанскіх злучэнняў і штаба 65-й арміі. Былі вызначаны сумесныя дзеянні супраць ворага. Перад партызанскімі брыгадамі 37-й імя А. Я. Пархоменкі (камандзір А. В. Львоў, камісар М. Б. Храпко) і 1-й Бабруйскай (камандзір В. І. Лівенцаў, камісар Дз. А. Ляпёшкін) была пастаўлена задача знішчыць варожыя гарнізоны ў вёсках Коўчыцы-1, Малімоны, Тураўка, перарэзаць дарогі Дражня-Парычы, Коўчыцы-2-Парычы і не дапусціць адыходу гітлераўцаў. Партызаны сумесна з часцямі 65-й арміі выканалі пастаўленую задачу.

У 1967 года на магіле пастаўлены помнік — скульптура воіна з аўтаматам і каскай у руках.