Дэнтыпеліс ломкі, дэнтыпеліс крохкі (Dentipellis fragilis) — від базідыяльных грыбоў з парадку сыраежкавых.
Пладовае цела мякка-перапончатае, пры высыханні крохкае, ад белаватага спачатку да жаўтаватага і вохрыстага колеру, памерам да 10 см і больш. Край свабодна аддзяляецца, часта адагнуты. Гіменафор складаецца з шыпоў памерам 0,5–9 X 0,1–0,4 мм. Цыстыды шматлікія, з масляністым змесцівам, ружанцападобна сегментаваныя ў верхняй частцы, шырынёй 4,5–7,5 мкм. Гіфы са спражкамі. Базідыі булавападобныя, 27–37 X 4,5–7 мкм. Споры эліптычныя або амаль сферычныя, з патоўшчанай гладкай ці шурпатай абалонкай, 4–6,3 X 3,3–6 мкм
Арэал ахоплівае Еўропу, Каўказ, Сібір, Сярэднюю Азію, Далёкі Усход. Адзначаны ў паўднёвай і паўднёва-заходняй частках Беларусі.
Сустракаецца ў шыракалістых, чорнаальховых і яловых, часта сырых і цяністых лясах. Індыкатар стараўзроставых мінімальна парушаных лясных экасістэм. Жыве і ўтварае пладовыя целы на значна раскладзенай валежнай, пазбаўленай кары драўніне лісцевых парод (клёна вастралістага, вольхі чорнай, граба звычайнага і інш.).
Сапратроф, выклікае белую гніль. Пладовыя целы ўтвараюцца ў ліпені-верасні.
Уключаны ў Чырвоную кнігу Беларусі, ахоўваецца ў Польшчы.
_Donk_204703.jpg)
