Заслаўскія

Заслаўскія, Жаслаўскія — княжацкі род герба «Астрог» зменены (страла над паўкальцом заменена на крыж), адгалінаванне князёў Астрожскіх. Малодшы брат князя Івана Васілевіча Астрожскага Юрый (каля 1430 — каля 1500) пры падзеле бацькоўскіх вотчын атрымаў Заслаўе на Валыні (цяпер г. Ізяслаў Хмяльніцкай вобласці, Украіна). Яго нашчадкі тытулаваліся князямі Заслаўскімі. Асноўная іх дзейнасць была звязана з Украінай.

Да Беларусі мелі дачыненне ў другой палове 16 ст. дзеці Кузьмы Іванавіча (каля 1500—1562), які быў жанаты з княгіняй Настассяй Юр’еўнай Гальшанскай-Дубровіцкай. Дзеці ад гэтага шлюбу ў 1556 годзе пры падзеле спадчыны згаслага роду князёў Гальшанскіх атрымалі палову маёнткаў Глуск у Новагародскім і Рычаў у Пінскім павеце. 3 іх Януш Кузьміч (каля 1530—1567) пакінуў сына Януша (каля 1550—1629). Яго сястра Ганна Кузьмінічна (? — 1582) была жонкай князя Івана Фёдаравіча Чартарыйскага. У 1581 годзе яна адкупіла ў свайго пляменніка яго долю ў названых маёнтках, якія потым адышлі да князёў Чартарыйскіх. Нашчадкі Януша Янушавіча існавалі да 1677 года.

Літаратура

Заслаўскія // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — 688 с. — ISBN 985-11-0314-4 (т. 1), ISBN 985-11-0315-2.
Wolff J. Kniaziowie litewsko-ruscy od końca czternastego wieku. Warszawa, 1895. S. 594—605.

Спасылкі

На Вікісховішчы ёсць медыяфайлы па тэме Заслаўскія