Брэсцкі абласны суд
| Брэсцкі абласны суд | |
|---|---|
| Інстанцыя | суд першай інстанцыі, суд апеляцыйнай інстанцыі, суд касацыйнай інстанцыі |
| Юрысдыкцыя | Брэсцкая вобласць |
| Мовы справаводства | беларуская і руская |
| Кіраўніцтва | |
| Старшыня | Тамара Іванаўна Сучок |
| Зала пасяджэнняў | |
| Месцазнаходжанне | Брэст |
| Адрас | 224000 г.Брэст, вул.Савецкіх пагранічнікаў, 41 |
Брэсцкі абласны суд — вышэйшы орган судовай улады на тэрыторыі Брэсцкай вобласці па грамадзянскіх, крымінальных, адміністрацыйных справах, падсудных судам агульнай юрысдыкцыі. Таксама ажыццяўляе нагляд за працай ніжэйстаячых судоў, вывучае судовую практыку, аналізуе і вядзе судовую статыстыку, аказвае дапамогу ніжэйстаячым судам у выкарыстанні заканадаўства[1]. Размешчаны ў Брэсце па адрасе вул. Савецкіх пагранічнікаў, 41.
Брэсцкі абласны суд складаецца з 25 суддзяў, у тым ліку старшыні, першага намесніка і намеснікаў старшыні суда. У структурным плане складаецца з дзвюх судовых калегій, па грамадзянскіх і крымінальных справах, і прэзідыума.
Гісторыя[правіць | правіць зыходнік]
Брэсцкі абласны суд быў заснаваны ў снежні 1939 года ў адпаведнасці з пастановай Вярхоўнага Савета БССР ад 14 лістапада 1939 года аб прыняцці Заходняй Беларусі ў склад БССР. У арганізацыйную структуру Брэсцкага абласнога суда ўваходзілі 4 падраздзяленні: судовая калегія па крымінальных справах, судовая калегія па грамадзянскіх справах, бухгалтэрыя і канцылярыя. У сувязі з нямецкай акупацыяй з чэрвеня 1941 года Брэсцкі абласны суд сваю дзейнасць спыніў, аднавіў яе толькі ў ліпені 1944 года[2].
З 1939 года па 1941 і з 1944 па 1946 гады суд падпарадкоўваўся Народнаму камісарыяту юстыцыі БССР. Згодна з Указам Прэзідыума Вярхоўнага Савета БССР ад 26 сакавіка 1946 года «Аб пераўтварэнні Народнага Камісарыята юстыцыі БССР у Міністэрства юстыцыі» Брэсцкі абласны суд стаў падпарадкоўвацца Міністэрству юстыцыі. 20 лютага 1960 года указам Прэзідыума Вярхоўнага Савета БССР Міністэрства юстыцыі было ліквідавана, і яго функцыі па кіраўніцтве раённымі народнымі і абласнымі судамі былі перададзены Вярхоўнаму суду БССР[2].
Праз пэўны перыяд часу Міністэрства юстыцыі аднавіла сваю дзейнасць, і пытанні кадравага, арганізацыйнага і матэрыяльна-тэхнічнага забеспячэння дзейнасці судоў Брэсцкай вобласці былі аднесеныя да кампетэнцыі рэгіянальнага падраздзялення Мінюста — Упраўлення юстыцыі Брэсцкага аблвыканкама. У функцыі Брэсцкага абласнога суда ўваходзіў разгляд крымінальных і грамадзянскіх спраў па першай інстанцыі і па другой інстанцыі — па скаргах асуджаных і пратэстах пракурора[2].
Указам Прэзідыума Вярхоўнага Савета БССР ад 14 жніўня 1954 года ў абласным судзе быў утвораны прэзідыум, якому было дадзена права разгляду крымінальных і грамадзянскіх спраў у парадку нагляду па тых прыгаворах і рашэннях народных судоў, якія ўступілі ў сілу, а таксама перагляду ўласных прысудаў[2].
У чэрвені 2019 года суд пераехаў з будынка па вуліцы Савецкіх пагранічнікаў, 41 у Дом правасуддзя па праспекце Машэрава, 8[3].
Кіраўніцтва[правіць | правіць зыходнік]
- Тамара Іванаўна Сучок (Старшыня Брэсцкага абласнога суда)
- Эдуард Валер'евіч Каспяровіч (першы намеснікі)
- Андрэй Леанідавіч Курысюк (намеснік старшыні, старшыня калегіі па крымінальных справах)
- Алена Пятроўна Хацько (намеснік старшыні, старшыня калегіі па грамадзянскіх справах)
Зноскі
- ↑ Структура судов / Областной суд Архівавана 19 лістапада 2018.
- ↑ а б в г Гісторыя Брэсцкага абласнога суда Архівавана 1 снежня 2018.
- ↑ В Бресте открылся Дом правосудия
Спасылкі[правіць | правіць зыходнік]
На Вікісховішчы пакуль няма медыяфайлаў па тэме, але Вы можаце загрузіць іх- Старонка Брэсцкага абласнога суда на сайце Вярхоўнага Суда Рэспублікі Беларусь Архівавана 11 верасня 2018.
