Евангелісты

Евангелі́сты (грэч. εύαγγελιστής — тыя, хто ўзвяшчаюць добрую вестку) — апосталы, аўтары чатырох кананічных Евангелляў — Матфей, Марк, Лука і Іаан.

Евангеліст	Сімвал	Евангелле	Род дзейнасці
Матфей	Анёл	Евангелле ад Матфея	Мытар (зборшчык падаткаў). Прапаведаваў у Эфіопіі, дзе прыняў пакутніцкую смерць каля 60 года (па іншых даных, быў пакараны ў малаазійскім горадзе Іераполіс).
Марк	Леў	Евангелле ад Марка	Пляменнік апостала Варнавы, вучань апостала Пятра. Лічыцца заснавальнікам Александрыйскай царквы і яе першым біскупам. Прыняў пакутніцкую смерць у 68 годзе.
Лука	Цяля	Евангелле ад Лукі	Урач, паплечнік апостала Паўла. Акрамя Евангелля з’яўляецца аўтарам кнігі Апостальскіх дзеянняў. Прыняў пакутніцкую смерць у грэчаскіх Фівах.
Іаан	Арол	Евангелле ад Іаана	Малодшы брат апостала Якава, да паклікання Ісусам быў рыбаком. Акрамя Евангелля, напісаў Кнігу Адкрыцця і тры пасланні, якія ўвайшлі ў Новы Запавет. Адзіны з апосталаў, які сканаў натуральнай смерцю ў старасці.

У старажытнасці гэта назва была больш шырокай; так зваліся ўсе прапаведнікі Евангелля ці хрысціянства. Сярод пратэстантаў такое ўжыванне слова захавалася: так завуцца місіянеры і іншыя асобы, якія прапаведуюць хрысціянства, што заключаецца ў Евангеллях. У старажытнай хрысціянскай царкве была асобная ступень ці пасада евангелістаў адмыслова для пропаведзі Евангелля сярод іўдзеяў і язычнікаў.

Гл. таксама

Сімвалы евангелістаў
Евангелістамі таксама завуць розныя плыні т. зв. Евангельскіх хрысціян.

Пры напісанні артыкула выкарыстаны матэрыял з Энцыклапедычнага слоўніка Бракгаўза і Эфрона (1890—1907).