Луканка

З пляцоўкі Вікіпедыя
Jump to navigation Jump to search
Луканка

Луканка балгарская (часам вострая) салямі, унікальная для балгарскай кухні. Яна падобна да суджука, але часта больш прыпраўленая. Луканка ўяўляе сабой сухую каўбасу плоскай цыліндрычнай формы і карычнева-чырвонага колеру, якая, як правіла, раўнамерна пакрыта тонкім пластом белай цвілі. Спалучэнне невялікіх кавалкаў мяса і тлушчу надаюць каўбасе мазаічны выгляд.

Традыцыйна, луканку робяць з фаршу са свініны, цяляціны і спецый (чорны перац, зіра, соль), якім начыняюць сушаныя каровіны кішкі. Пасля цыліндрычную салямі падвешваюць для прасушкі прыблізна ад 40 да 50 дзён у добра вентыляваным месцы. У працэсе сушкі, салямі сціскаюць, каб яна набыла сваю тыповую плоскую форму. Луканку звычайна дробна наразаюць і падаюць халоднай у якасці закускі.

Смакавыя якасці луканкі залежаць ад прыродных асаблівасцяў рэгіёну, дзе яна выраблена, і фармуюцца пад уплывам тыповай мікрафлоры мясцовага геаграфічнага асяроддзя. Ёсць некалькі рэгіёнаў Балгарыі, добра вядомыя вытворчасцю луканкі. Большасць з іх размешчаны ў цэнтральнай частцы Балгарыі, ля падножжа Балканскіх гор, у прыватнасці ў рэгіёнах Смядова, Панагюрышта і Карлова.