Новасібірскі дзяржаўны аграрны ўніверсітэт

Новасібірскі дзяржаўны аграрны ўніверсітэт
Заснаваны	1936
Сайт	nsau.edu.ru

Новасібірскі дзяржаўны аграрны ўніверсітэт (руск.: Новосибирский государственный аграрный университет) — вышэйшая навучальная ўстанова Новасібірска. Буйны навукова-адукацыйны цэнтр дзвюх абласцей Заходняй Сібіры: Новасібірскай, Томскай. За гады працы ўніверсітэт падрыхтаваў больш за 55 000 спецыялістаў для прадпрыемстваў АПК.

11 верасня 1936 г. Новасібірскі сельскагаспадарчы інстытут адкрыўся для першых студэнтаў. За год да гэтага, 14 лістапада 1935 года, быў падпісаны загад наркама земляробства СССР, паводле якога ў Новасібірску павінен быў быць арганізаваны сельскагаспадарчы інстытут з двума факультэтамі: агранамічным і заатэхнічным.

Да пачатку заняткаў быў падабраны выкладчыцкі склад: прафесары, дацэнты, асістэнты, арганізавана шэсць кафедр. У 1941 годзе адбыўся першы выпуск спецыялістаў: 45 аграномаў і 34 заатэхніка. У 1944 годзе, нягледзячы на ўсе складанасці ваеннага часу, адкрываецца факультэт механізацыі, у 1945 годзе — завочнае аддзяленне, якое праз дзевяць гадоў пераўтварылася ў факультэт завочнай адукацыі і ў 1992 годзе разам з факультэтам павышэння кваліфікацыі ператварылася ў інстытут завочнай адукацыі і павышэння кваліфікацыі. У 1960 годзе адкрыўся эканамічны факультэт, у 1962 годзе ад агранамічнага факультэта аддзяліўся першы за Уралам факультэт абароны раслін. У 1979 годзе пачалася падрыхтоўка ветэрынарных урачоў.

У 1982 годзе ў Кемерава адкрываецца першы філіял, які пазней будзе пераўтвораны ў Кемераўскі сельскагаспадарчы інстытут, а ў 2002 годзе атрымае статус самастойнай ВНУ. У 1990-х гадах у Томску з’яўляецца яшчэ адзін філіял — цяпер Томскі сельскагаспадарчы інстытут, у 2004 годзе — Паўночны філіял у горадзе Калпашава Томскай вобласці (закрыты).

У 1991 годзе інстытут прайшоў дзяржаўную атэстацыю і атрымаў статус універсітэта. У яго складзе з’яўляюцца юрыдычны факультэт і факультэт дзяржаўнага і муніцыпальнага ўпраўлення.

Пачынаюць фармавацца міжнародныя сувязі, што прыводзіць да арганізацыі міжнароднага аддзела, які працягвае актыўна развівацца і ўдасканальвацца. У тым жа 1991 годзе ў структуры ўніверсітэта ствараецца навукова-даследчы інстытут ветэрынарнай генетыкі і селекцыі. У 1996 годзе быў створаны НДІ жывёлагадоўлі, у 2003 — НДІ аховы раслін.