Джэймс Максвел

Джэймс Максвел

Джэймс Кларк Максвел (англ.: James Clerk Maxwell; 13 чэрвеня 1831, Эдынбург — 5 лістапада 1879, Кембрыдж) — брытанскі фізік, аўтар класічнай электрамагнітнай тэорыі.

Біяграфія

Нарадзіўся ў Эдынбургу ў шатландскай дваранскай сям’і. Вучыўся ў Эдынбургскай акадэміі, Эдынбургскім універсітэце (1847—1850), Кембрыджскім універсітэце (1850—1854). Пасля працаваў у Трыніці-каледжы, Абердынскім універсітэце, Лонданскім універсітэце, арганізаваў і ўзначаліў Кавендышаўскую лабараторыю.

Навуковыя дасягненні

Джэймс Кларк Максвел распрацаваў класічную электрамагнітную тэорыю, якая дазволіла апісаць усе электрычныя і магнітныя з'явы з дапамогай чатырох ураўненняў, якія носяць назву ураўненняў Максвела. З гэтае тэорыі вынікала, што паміж электрычнымі і магнітнымі з'явамі маецца непарыўная сувязь. Пераменнае электрычнае поле непазбежна параджае пераменнае магнітнае поле, і наадварот. З гэтага факту вынікала існаванне электрамагнітных хваляў, якія павінны распаўсюджвацца з хуткасцю святла. Максвел паказаў, што святло па сваёй прыродзе ёсць электрамагнітнай хваляй. Сярод іншых дасягненняў Максвела, у прыватнасці, у галіне малекулярна-кінетычнай тэорыі газаў, ёсць адшуканне закону размеркавання малекулаў ідэальнага газу па хуткасцях — размеркаванне Максвела.

Асноўныя працы

• On the Description of Oval Curves, and those having a plurality of Foci. Proceedings of the Royal Society of Edinburgh, Vol. ii. 1846.
• Illustrations of the Dynamical Theory of Gases. 1860.
• On Physical Lines of Force. 1861.
• A Dynamical Theory of the Electromagnetic Field. 1865.
• On Governors. Proceedings of the Royal Society, Vol. 16 (1867–1868) pp. 270–283.
• Theory of Heat. 1871.
• On the Focal Lines of a Refracted Pencil. Proceedings of the London Mathematical Society s1-4(1):337-343, 1871.
• A Treatise on Electricity and Magnetism. Clarendon Press, Oxford. 1873.
• Molecules. Nature, September, 1873.
• On Hamilton's Characteristic Function for a Narrow Beam of Light. Proceedings of the London Mathematical Society s1-6(1):182-190, 1874.
• Matter and Motion, 1876.
• On the Results of Bernoulli's Theory of Gases as Applied to their Internal Friction, their Diffusion, and their Conductivity for Heat.
• "Ether", Encyclopaedia Britannica, Ninth Edition (1875-89).
• An Elementary Treatise on Electricity Clarendon Press, Oxford. 1881, 1888.

У Сеціве

• На Вікісховішчы ёсць медыяфайлы па тэме Джэймс Максвел