Аляксандр Ян Масевіч

Аляксандр Ян Масевіч
Герб «Копач»
21-ы Ваявода мсціслаўскі 1690 — 1697
Папярэднік	Шыман Караль Агінскі
Пераемнік	Міхал Сясіцкі
Маршалак земскі лідскі 1684 — 1690
Папярэднік	Ян Станіслаў Курч
Пераемнік	Эльяш Міхал Рымвід
Смерць	12 сакавіка 1697(1697-03-12)
Род	Масевічы
Жонка	Кацярына з Млондскіх[d]

Аляксандр Ян Масевіч (? — 12 сакавіка 1697) — дзяржаўны дзеяч Вялікага Княства Літоўскага, мсціслаўскі ваявода (з 1690).

Паходзіў з незаможнага шляхецкага роду герба «Копач» (зменены). У маладосці на вайсковай службе ў Сапегаў. Ваяваў супраць украінскіх казакоў, супраць шведаў пад Варшавай (1656). У 1658 у якасці камісара гетмана Паўла Яна Сапегі ўдзельнічаў у складанні інвентара Ляхавіцкага замка.

У 1659—1661 падстараста Рэтаўскага цівунства, што належала Сапегу. Лідскі пісар гродскі ў 1660-х гадах, пісар земскі з 1671, харунжы з 1680, маршалак з 1684, мсціслаўскі ваявода з 1690; цівун шадаўскі з 1674, дэпутат Трыбунала ВКЛ у 1667, пасол на соймы 1668, 1677, 1683, 1685 (на трох апошніх абіраўся ў склад Скарбовага Трыбунала ВКЛ), 1688, 1689, маршалак Трыбунала ВКЛ у 1691.

У 1669 удзельнічаў у выбарах караля польскага і вялікага князя літоўскага Міхала Вішнявецкага, у 1674 — Яна III Сабескага.

У пачатку 1670-х гадоў маршалак двара Казіміра Яна Сапегі. Удзельнічаў у Хоцінскай бітве 1673. На сойме 1683 абраны ў склад камісіі па перагаворах з Расіяй (пасяджэнні праходзілі ў Кадзіне). З пераходам у 1680-х гадах Сапегаў у апазіцыю да каралеўскага двара Масевіч стаў адным з лідараў сапегаўскага лагера на соймах Рэчы Паспалітай.

Меў маёнткі ў Лідскім павеце.

Літаратура

• Масевіч Аляксандр Ян // Вялікае княства Літоўскае: Энцыклапедыя. У 3 т. / Рэдкал.: Т. У. Бялова (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2010. — Т. 3: Дадатак. А — Я. — С. 342. — 696 с. — ISBN 978-985-11-0487-7 (т. 3), ISBN 985-11-0315-2.