Аркадзь Качан

Аркадзь Качан
Аркадзь Качан
Род дзейнасці	беларускі грамадскі і вайсковы дзеяч
Дата нараджэння	13 мая 1921
Месца нараджэння	Барсукі, гміна Порплішча, Дунілавіцкі павет, Навагрудскае ваяводства, Польская Рэспубліка;
Дата смерці	4 снежня 1982 (61 год)
Месца смерці	Сідней, Новы Паўднёвы Уэльс, Аўстралія;
Месца пахавання	могілкі Руквуд;
Бацька	Антон Качан
Маці	Вера Качан
Жонка	Вольга Качан
Член у	Беларускае аб’яднанне ў Новым Паўднёвым Уэльсе (надпалітычнае); Рада БНР; Беларускі культурна-грамадскі клуб; Федэральная рада беларускіх арганізацый у Аўстраліі;

Аркадзь Качан (13 мая 1921 — 4 снежня 1982) — беларускі грамадскі і вайсковы дзеяч.

Біяграфія

Нарадзіўся 13 мая 1921 г. у в. Барсуках Навагрудскага ваяводства ў Польскай Рэспубліцы у сям’і настаўнікаў Антона і Веры Качаноў.

Вучыўся ў Дзісенскай польскай гімназіі, у 1941 г. скончыў дзесяцігодку ў Маладзечне. Пазней працаваў сакратаром суда ў Глыбокім. Па сканчэнні курсаў каманднага складу Беларускай самааховы ў Лебедзеве каля Маладзечна кіраваў ротай 13-га Беларускага паліцыйнага батальёну СД у Вілейскай акрузе. Улетку 1944 г. выехаў у Германію і трапіў у дывізію «Беларусь», разам з якой пазней здаўся амерыканцам.

Па вайне некалькі гадоў правёў у лагеры для перамешчаных асобаў у Розенгайме. Ад 1950 г. жыў у Аўстраліі, у Сіднеі. Адзін з заснавальнікаў і доўгагадовы сакратар Беларускага аб’яднання ў Новай Паўднёвай Валіі. Сябра Рады БНР, Беларускага культурна-грамадскага клуба і Федэральнай рады беларускіх арганізацый у Аўстраліі. Пры канцы 1970-х гг. — беларускі прадстаўнік у Выканаўчым камітэце Этнічнай рады ў Новай Паўднёвай Валіі. Адзін са стваральнікаў і каардынатар беларускага радыё ў Сіднеі. Сталы фундатар беларускіх выданняў і ўстаноў на эміграцыі. Дасылаў беларускую літаратуру ў бібліятэкі аўстралійскіх універсітэтаў.

Памёр 4 снежня 1982 г. у Сіднеі. Пахаваны на беларуска-ўкраінскай частцы могілак Роквуд.