Сан-Вісенты (востраў)

Сан-Вісенты
парт. São Vicente
Паўночнае ўзбярэжжа
Характарыстыкі
Плошча	227 км²
Насельніцтва	81 014 чал.
Шчыльнасць насельніцтва	356,89 чал./км²
Размяшчэнне
16°51′ пн. ш. 24°58′ з. д.
Акваторыя	Атлантычны акіян
Краіна	Каба-Вердэ
Сан-Вісенты
Медыяфайлы на Вікісховішчы

Сан-Вісе́нты (партуг. São Vicente) — востраў у краіне Каба-Вердэ, уваходзіць у паўночную групу астравоў Барлавенту. Агульная плошча 227 кв. км. Насельніцтва — 81 014 чал. (2015 г.). Найвышэйшы пункт — гара Монтэ-Вердэ (725 м). Самы буйны населены пункт — Міндэлу.

Гісторыя

Востраў Сан-Вісенты быў адкрыты партугальцамі 22 студзеня 1462 г. Да XIX ст. выкарыстоўваўся пераважна для выпасу свойскай жывёлы. З-за нястачы пітной вады іншыя формы гаспадарання амаль не развіваліся. У 1838 г. для абслугоўвання брытанскіх ваенных і гандлёвых караблёў быў пабудаваны порт Порту-Гранды, які ператварыўся ў развіты гандлёвы цэнтр. Насельніцтва хутка расло. Характэрна, што да нашых дзён большасць жыхароў Сан-Вісенты — гараджане (92,6 % у 2010 г.).

Геаграфія

Востраў мае вулканічнае паходжанне. Значная частка пакрыта горнымі масівамі. Найвышэйшы пункт — гара Монтэ-Вердэ (725 м). Паверхневых вадацёкаў мала.

Клімат сухі трапічны. Сярэднегадавая тэмпература — 24 °C. З лістапада па ліпень цягнецца сухі сезон, які суправаджаецца моцнымі вятрамі. Са жніўня па кастрычнік — сезон дажджоў.

Насельніцтва

Насельніцтва Сан-Вісенты (1940—2010 гг.)
1940	1950	1960	1970	1980	1990	2000	2010
15848	19576	20705	31578	41594	51277	67163	76107

Эканоміка

Традыцыйна эканоміка вострава абапіраецца на гандаль і аказанне паслуг. З-за спецыфічных кліматычных умоў сельская гаспадарка развіта слаба. Пэўную ролю адыгрывае лоў амараў. Прамысловасць сканцэнтравана ў прамысловым раёне Лазарэту. На Сан-Вісенты знаходзіцца галоўны марскі порт краіны — Порту-Грандэ. Развіваецца турызм. Узровень беспрацоўя адзін з самых высокіх у Каба-Вердэ.

Культура

Сан-Вісенты часцяком называюць культурнай сталіцай Каба-Вердэ. Адсюль паходзяць многія значныя культурныя дзеячы гэтай краіны, у тым ліку знакамітая спявачка Сезарыя Эвара.

На Сан-Вісенты праводзяцца буйныя фестывалі пляжнай музыкі (жнівень), куды з’язджаюцца музы́кі з усяго архіпелага, і маляўнічы карнавал (сярэдзіна лютага).

Спасылкі

• На Вікісховішчы ёсць медыяфайлы па тэме Сан-Вісенты (востраў)
• ISLAND OF SÃO VICENTE
• Sao Vicente Cape Verde cultural capital
• São Vicente: Music, art and culture
• Cape Verde Atmospheric Observatory
• Морабеза острова Сан-Висенти